المساعد الشخصي الرقمي

مشاهدة النسخة كاملة : انا من هذا الجيل .. ادخل وشارك بذكرياتك(للمهندس محمد عبد الرحيم والأستاذه هناء محمد)


مهندس محمد عبد الرحيم
31-10-2009, 04:25 PM
انا من هذا الجيل

هذه الرسالة مهداه للجميع وبشكل خاص لكل من على مشارف الأربعين أو أكثر

بالرغم من أنني أنتمي لجيل غير الجيل الحالي ولكني أعشق التواصل معه فماهو إلا إمتداد لجيل سابق

قد يكون بعض القراء ينتمون إليه ويدركون ماأعنيه لاحقا

أنا أنتمي لجيل شهد في بداياته نهاية زعيم كبير مثل عبد الناصر كنت في الثالثة لا اتذكر إلا خيالات لهذا اليوم

ولكني أتذكر حرب أكتوبر والأجازة من المدرسة والزجاج وعليه الجلاد الأزرق وصوت الغارات التي تدق في اوقات مختلفة

من النهار وشباب الدفاع المدني ، لم اكن أعي ماذا تعني إسرائيل ولكني وعيت حلاوة الإنتصار في الوجوه

أنا أنتمي لجيل شهد صباحا مانشيت أسود من ثلاث كلمات (وقتها كانت المانشيتات بالأحمر وبالرقعة)

في جريدة الاخبار كانت الكلمات هي "وماتت أم كلثوم" ،

أنا من جيل شهد أنورالسادات يفتتح قناة السويس بزي البحرية الأبيض وزهوة النصر والكرامة

على وجهه وبجواره شاه إيران ويتجول بقارب بحري وسط أصوات نفير السفن في نفس تاريخ النكسة

ولكن عام خمسة وسبعين ، أنا من جيل شاهد على الهواء لحظات نزول أنور السادات مطار اللد بتل أبيب ليلا

وسط جو مشوش ومشحون ومتناقض بين موافق ومعترض على مايقدم عليه ، أنا من جيل شاهد حادث المنصة

ولاندري ماذا حدث وبعدها بساعة كان الخبر من راديو مونت كارلو بأن مصادر شبه مؤكدة بأن الرئيس السادات وافته المنية ..

هكذا كان الخبر

أنا من جيل كانت إذاعته المفضلة والوحيدة راديو مونت كارلو تذيع أغاني عربية وغربية هكذا كنا نطلق عليها

أغاني غربية وليست أجنبية ، وأصوات مذيعيين مثل حكمت وهبي وجورج قرداحي وفريدة الزمر وميساء وسناء

منصور وسلمى الشماع كان وقتها اسمها سلمى فقط ، أنا من جيل كان ساعة العصاري يقف في الشباك الخامسة عصرا

مع كوب الشاي ليكتشف ماذا سوف تغني أم كلثوم الساعة الخامسة في إذاعة ام كلثوم وماذا نتوقع ان تكون أغنية

الساعة التاسعة حيث كانت الإذاعة بدون مذيعيين

أنا من جيل كان يتابع مايطلبه المستمعون بإذاعة الشرق الأوسط كل يوم الساعة الثانية والنصف ظهرا


ولكل يوم محدد من أيام الأسبوع نجم أو إثنين من عمالقة الغناء ، وفي الثالثة والنصف وخمس دقائق بعد للنساء فقط

كان برنامج الشارع الغربي لأحمد فوزي قبل أن يصبح ديسكو تمانية لمحمد شبل وفي الرابعة والربع

كانت قصص الاطفال لعمو حسن وبدايته الشهيرة أصدقائي الصغار مساء الخير ،

أنا من جيل شاهد التليفزيون الأبيض والأسود مع برامج النادي الدولي لسمير صبري والسينما والحرب لأحمد سمير

وأوتوجراف لطارق حبيب قبل التحول للتليفزيون الملون والتحول كان تدريجيا فلم تكن كل البرامج تذاع بالألوان

وعرض البرامج بصحيفة الاخبار كان يعرض دائرة حمراء على البرامج التي سوف تذاع بالألوان ،

أنا من جيل شاهد برامج شهيرة لسنوات طويلة مثل جولة الكاميرا لهند ابو السعود نورعلى نور لأحمد فراج

وحياتي لفايزة واصف واخترنا لك لفريال صالح اسبوع ونجوى ابراهيم أسبوع آخر وكان فيه أغنية كوكوواوا الشهيرة

وطيري طيري ياعصفورة وأغاني ديميس روسوس وهو لسه تخين ، وكانت حلقة نجوى ابراهيم أجمل دائماً ،

والموسيقى العربية للدكتورة رتيبة الحفني وطقطقوة لعبده الحامولي ، وعالم الحيوان لأحمد سعيد قبل محمود سلطان

وحلقات فرديناد قبل صلاة الجمعة في سينما الأطفال ومغامرات وليد وراندا في الفضاء وبوبي الحبوب ، ومحو الأمية

وعبد البديع قمحاوي وعزيزي الدارس عزيزتي الدارسة ، والبرامج التعليمية من خمسة عصراً لستة ،

وبرنامج عصافير الجنة وصباح الخير مع بقلظ وقبلها كان يقدم عصراً بإسم مساء الخير ، ومطرب الأطفال طلعت عطية

كان مقررا علينا ، والمصارعة الحرة لفريد حسن ، وبرنامج أيام وليالي عصر يوم الجمعة ، و العالم يغني لحمدية حمدي

وكانت تقدم أغاني تينا تشارلز والباكراه والفيلديج بيبول والسوبرترامب والمغنية التركية أمل سايين والإستعراضية الإيطالية

رافييلا كارا ، قبل أعوام من برنامج سلوكيات لملك إسماعيل وخمسة سياحة لجانيت فرج ،ومذيعات للنشرة مثل

زينب الحكيم وهمت مصطفى ومذيعين مثل محمود سلطان وأحمد سمير وشفيع شلبي وعبد الرحمن علي

أنا من جيل شاهد بشغف جميع حلقات رجل بستة مليون دولار ل لي ماجورز الشهير بإستيف اوستن وحلقات المرأة الخارقة

أو بيونيك وومن لليندا ساي واجنر وبعدها حلقات الرجل الأخضر قبل حلقات نايت رايدر وبعدها باعمار حلقات ماكجيفر،

أنا من جيل كان ينتظر حلقة التاسعة والربع الأجنبية على القناة الثانية مثل مسلسل الجذور وبطله كونتا كينتي ،

أو مسلسل دالاس ونجمه الشرير جي آر ، قبل حلقات نوتس لاندينج والمسلسل الإنجليزي الكلاسيكي ناس فوق وناس تحت

أو أب ستيرز داون ستيرز هذا كان قبل سنوات من المسلسل الياباني أوشين وحلقات ذي بولد أند ذا بيوتيفول

أنا من جيل كان يتابع بشغف حلقات كولومبو بطولة بيتر فولك وحلقات كوجاك بطولة النجم الأصلع تيلي سافالس

وحلقات ميستري موفي التشويقية في الثالثة والربع على القناة الثانية ، وإعلانات سيجال خمس حروف يتاقلوا بمال وإنجرام

ونجوم الكرة الاربعة ، وزجمار للموتسيكلات وعنده هوندا وعنده جاوا ، وريري إجري بسرعة ياواد ياحسين وشهادات الإستثمار

فوايدها علينا كتار ، وإعلان وبعد عشرين سنة تيجي الحاجات تغلى إمم يبقى عملنا إيه ، وسلام عشان خضر العطار ،

وصلاح الدين حبيب الملايين أعتقد انه كان بيبيع تيلفزيونات ، والإعلانات الثابتة لأوكازيونات شركة بيع المصنوعات المصرية

وعمر افندي ، وبيع بالمزاد العلني الخبير المثمن والمصفي القضائي حلمي خزام وناجي خزام ، قبل إعلانات سر شويبس

ومحمود إيه ده يامحمود وتخلص من حمامك القديم ولاكتويل أي لايك إت ،وبدل الإسماعيلية خليك شيك ،

وباك بتاعي باك بتاعك ، ومام إتس مام ، وجرافينا ، وإبحث عن وردة تيودور ، وأولد سبايس وعلامة الرجولة والسيمفونية

الشهيرة مع راكب الامواج ، وعطر باكوس للرجال ، ومعجون المعاجين أرتيف بالفلورين معجون الأسنان بتحبه الملايين ،

وأمواس ناسيت ومعجون جيبس سار وإعلانات مارلبورو تعال إلى حيث النكهة

ماكنتش إعلانات السجاير ممنوعة في التليفزيون وقتها

الى اللقاء فى الحلقة القادمة
لو عجبتكم ان شاء الله اطلبوا الحلقة الثانية

ذكرى لعيبي
31-10-2009, 04:43 PM
الأستاذ محمد
وما احلاه هذا الجيل وما أنقاه ( عفوا من الجيل الحاضر ) ،
ذكريات وذكريات ، شريط الحياة يمرق امامي الآن وكأني
اعود لذاك الوقت الذي ذكرت
أتوق إلى الحلقة الثانية استاذ محمد
تحياتي

مهندس محمد عبد الرحيم
31-10-2009, 04:46 PM
اسعدنى مرورك سيدتى
وما احلى الزكريات
والحلقة القادمة اروع واهديها لكل من عايش معنا الايام الجميلة
ايام ماقبل الدش والمحمول والنت
ايام التواصل الجميل
شكرا لك سيدتى على مرورك الكريم

غادة رشيد
31-10-2009, 04:46 PM
وانا افتخر انى من نفس هذا الجيل

ابدعت فى هذا الموضوع اخى محمد
واتتوق اخى محمد الى الحلقه الثانيه
وارجو من الادارة الموقرة تثبيت الموضوع

مشكورين

عيون الكنانه
غادة رشيد

مهندس محمد عبد الرحيم
31-10-2009, 04:48 PM
اشكرك سيدتى / غادة على مرورك الكريم
واوعدك يا غادة المنتدى ان اسرع بالحلقة الثانية
وياريت تساعدينى فى التثبيت
اشكرك

احمد الهاشمى
31-10-2009, 05:08 PM
الله الله الله

مااروعك اخي محمد

افتخراني حضرت جزء من هذا الجيب

كما افتخر ان اتابع معك بشغف

ويسرني ويسعد الاداره

ان نطلب تثبيت موضوعك في حلقات

ولمده تتناسب مع الطرح

والمتابعه

اسامة الهمساوي
31-10-2009, 05:16 PM
ماشاء الله على المواضيع الجامدة
والله ياباشمهندس فكرتنى بالذى مضى
ليت الزمان يعود يومابس حضرتك نسيت تقول انك من جيل ايام الكرامة وعزة النفس
ونسيت تقول انك من جيل ايام الادب والاحترام والالتزام
ونسيت تقول انك من جيل ايام لما كان الكبير بيعطف على الصغير .. والصغير يحترم الكبير
بصراحة
وبكل صراحة
انا كان نفسى احضر الايام دى
انا يادوب عندى 24 سنة وماشى فى 25 واللى الناس متعرفوش انهم شايفين لى عروسة
هههههههههه بس عروسة حلاوة
شكراااااااااااااا ياباشا على الموضوع الجديد من نوعه
وشكرااااااااااا للفكر الجديد
ياريت بعد كام يوم تدخل على الحلقة اللى بعدها
ومتنساش ال7 اقلام بتوع عنتر ولبلب
هههههههههههههههههههههههههههه

قمرالزمان
31-10-2009, 05:40 PM
اخى باشمهندس محمد

ليت الشباب يعود يوما

احلى ايام العمر

مع هذه الباقه من اشكال والوان

لقد جمعت لنا باقه

من عطر الريحان والنرجس والياسمين

فى سلة واحدة

هذه الايام لن ولم تتكرر

احلى مذيعين

انقى مسلسلات وافلام

اروع اغانى تستمع اليها بشغف

والله انا لسه للان احفظ كثير منها

بالرتم والموسيقى

اغانى تلتصق بالاذان

عمو حسن وابله فضيله

كنا بنقعد ننتظرهم ونستمع اليهم

بشغف

وحكايا ت الف ليله وليله

يااااااااااه

رجعتنا للزمن الجميل

بانتظار الحلقه القادمه بشغف

لاستعاده النقاء والرومانسيه

مشكور جدااا ولك تحياتى

سنووايت
31-10-2009, 07:34 PM
انا طبعا مش عارفه انتم بتتكلموا عن ايه بالظبط والكلام ده كان امتى بالظيط

لانى لست من هذا الجيل ابدااااااااااااااااااااااااا

هههههههههههههههههههه

الله عليك اخى العزيز محمد فعلا رجعتنا لايام جميله جدا وزكريات محفوره بداخلنا
خصوصا نحن سكان بورسعيد وايام الهجره من بلادنا

وفرحه ورجوعنا بعد النصر

مشكوور اخى العزيز محمد على انك زكرتنا بايام جميله

وفى انتظار باقى الروائع على احر من الجمر

ليدى المنتدى
31-10-2009, 08:42 PM
استاذى محمد لك الحق بالفخر
رغم اننى من جيل مبارك
وقريبا جمال

مهندس محمد عبد الرحيم
31-10-2009, 09:19 PM
أستاذى ؟ احمد الهاشمى
شكرا على تشريفك الموضوع يا باشا
وشكرا على تاييد التثبيت
والى اللقاء فى الحلقة القادمة

مهندس محمد عبد الرحيم
31-10-2009, 09:21 PM
الباشا: اللواء اسامة
شكرا على تشريفك الموضوع يا باشا
وخليك معانا بس وانت هاتستمتع بالذكريات الجميلة
زمن الاحترام والاصالة والعزة والكرامة
والى اللقاء فى الحلقة القادمة

مهندس محمد عبد الرحيم
31-10-2009, 09:35 PM
الاستاذة الفاضلة / قمر الزمان
انا سعيد جدا بتشريف حضرتك للموضوع
اكيد الزمن ده كان زمن جميل ومافتكرش هايرجع تانى
كانت ايام الاصالة ودلوقتى احنا فى ايام غريبة ربنا يعديها على خير
شكرا لمرورك والى الحلقة القادمة ان شاء الله

مهندس محمد عبد الرحيم
31-10-2009, 09:40 PM
الاستاذة الفاضلة / سنوووووووووووو
فاكرة افتتاح القناة واعلان بورسعيد نطقة حرة
كان يوم جميل واغنية نجاة حسب الميعاد جينا
اتحدى اى واحد بورسعيدى عاش الهجرة والعودة لبورسعيد يسمع اغنية نجاة حسب الميعاد جينا ودموعه ماتنزلش
ياه كانت ايام جميلة فين الايام دى دلوقتى
شكرا لمرورك والى الحلقة القادمة ان شاء الله
انا سعيد جدا بتشريف حضرتك للموضوع
اكيد الزمن ده كان زمن جميل ومافتكرش هايرجع تانى
كانت ايام الاصالة ودلوقتى احنا فى ايام غريبة ربنا يعديها على خير
شكرا لمرورك والى الحلقة القادمة ان شاء الله

مهندس محمد عبد الرحيم
31-10-2009, 09:48 PM
الصديقة / ليدى المنتدى
شكرا لمرور حضرتك على الموضوع
على فكرة كل جيل وله بهجته وحلاوته
بس عامة كل ما الدنيا بتتطور ورتم الحياة بيبقى اسرع
حلاوة الايام بتقل والذكريات دايما بتبقى احلى من الجديد
شكرا والى الحلقة القادمة ان شاء الله

هناء محمد
31-10-2009, 10:03 PM
الله عليك يا باشمهندس محمد وعلى موضوعاتك الشيقه
مش قادرة اقولك رجعتنى لانى عايشه فيها ومش قادره اعيش الحاضر لانى بحس انه صناعى بكل ما فيه - والطبيعى دايما يكسب - والله وانت بتتكلم عن شاى العصارى وكانك بتتكلم عنى - بس انت نسيت شاى الساعه 9 واحنا بنسمع الست ام كلثوم لغاية الساعه 10 وبعدها المحطه تقفل للصبح - واكمل انا بقى مع البرنامج الموسيقى واسمع الموسيقى الكلاسيك لغاية الساعه 3 الصبح .
بجد موضوع روعه وان شاء الله هتابعه بشغف - شكرا
تقبل تحياتى

مهندس محمد عبد الرحيم
31-10-2009, 10:12 PM
الصديقة / احبك ولكن
شكرا لمرورك الكريم وشكرا لزوقك فى التعبير عن الزمن الجميل
بس ماقلتيش حاجة عن اذاعة مونت كارلو حكمت وهبى وميساء وسلمى الشماع
انا شخصيا الصبح كان لازم فترة الصبح دى كلها مع مونت كارلو
شكرا لمرورك وسعيد ان الموضوع عجبك والى الحلقة القادمة

هناء محمد
31-10-2009, 10:19 PM
والله يا باشمهندس فترة الصبح دى كنت بقضيها ما بين اذاعه القران الكريم والبرنامج العام ( همسه عتاب وكلمتين وبس ) والشرق الاوسط بقى لغايه الساعه 5 - مش بقولك هتخلينى اتفتح فى الذكريات هههههههههههههههههههههههههههههه - ده انا لوحكيت يبقى موضوعك هيبقى مشترك بينى وبينك
تحياتى

مهندس محمد عبد الرحيم
31-10-2009, 10:31 PM
الصديقة / احبك ولكن
كلنا من هذا الجيل .. ومن هذا الزمن الجميل
وكلنا من حقنا نتكلم فى الموضوع بالعكس ده اهم ميزة فى الموضوع انه موضوع مشترك بينا كلنا
خلاص جهزى حلقة واعرضيها يعنى الحلقة الثالثة هاتبقى عليكى
ايه رايك ؟؟ انا هانزل الحلقة التانية بكرة او بعده وانتى تكونى جهزتى الحلقة الثالثة وهكذا حتى لو كل واحد حب يشترك يعمل حلقة عن زكرياته اللى بشترك مع الجيل فيها ها يبقى موضوع خطير بجد
فكرى وقولى رايك

هناء محمد
31-10-2009, 10:41 PM
شكرا لعرضك الرائع ده يا باشمهندس
بس اوام كده عاوزنى فى الحلقه التالته
خلاص انا هستنى اشوف حضرتك هتكتب ايه بكره او بعده ان شاء الله وهشوف لو عرفت هكتب وهبعتها لحضرتك ولو معرفتش هكتفى انى اشارك فيها
شكرا لعرض حضرتك الكريم مرة تانيه
تقبل تحياتى

مهندس محمد عبد الرحيم
31-10-2009, 11:05 PM
ان شاء الله هاتكتبى موضوع رائع
جمدى قلبك واكتبى بصدق وان شاء الله هايوصل للناس على طول
وان شاء الله هايبقى موضوع جميل ومين عارف يمكن اخوة تانيين يشاركوا ويبقى موضوع جماعى رائع

مهندس محمد عبد الرحيم
01-11-2009, 01:48 PM
الى حضراتكم الحلقة الثانية:36_3_11::36_3_11::36_3_11:

مهندس محمد عبد الرحيم
01-11-2009, 01:52 PM
انا فضلت ان الحلقة الثانية تكون موضوع جديد لعدم اطالة الموضوع وللتمييز بين كل حلقة واخرى
اشكركم على المتابعة

مهندس محمد عبد الرحيم
01-11-2009, 02:02 PM
بناء" على طلب الجماهير اتشرف بان اقدم الحلقة الثانية والتى ارجو ان تعجب حضراتكم
أنا من جيل شهد تحويل السلام الجمهوري إلى بلادي بلادي بتوزيع لعبد الوهاب لم ينل إستحساناً في البداية ، مثلما حدث مع موسيقى نشرة الأخبار ، أنا من جيل قبل أن يذهب للمدرسة كان يستمع وهو يرتدي المريلة إلى قرآن السادسة ثم حديث الصباح بعده ثم تمارين الصباح على البيانو كنا نسمعها ولم نمارسها أبدا حيث كنا منهمكين بشرب اللبن وتحضير الشنطة ووضع كراسة التسع أسطر والخط العربي ونسيان كراسة الرسم البياني البرتقالية اللون ، ثم يذيع الراديوأغاني الثلاثي المرح حلاوة شمسنا وراحة فين ياعزيزة حتى نشرة السابعة ، وقبل النزول كان برنامج طريق السلامة تقديم آيات الحمصاني وكانت مقدمته الغنائية بصوت شادية تقول بالسلامة ياحبيبي بالسلامة (حد فيكوا كان يعرف ان اللى بتقول بالسلامة يا حبيبى هى شادية) وصوت المقدمة بصوت صفوت الشريف ومن الثامنة للتاسعة كانت برامج كلمتين وبس وهمسة عتاب وأخبارخفيفة

أنا من جيل كان يقرأ ألغاز الغامرين الخمسة محب ولوزة بضفيرتها الشهيرة ونوسة وعاطف وتختخ ومعهم الشاويش فرقع والمفتش سامي وكوب الليمون المثلج في فيلا المعادي وحكايات الكوخ المحترق والرجل القرد وغيرها ، أنا من جيل كان يواظب على قراءة ميكي وميكي جيب ومعهم عصابة القناع الأسود ومدينة البط وعم دهب وزيزي وتوتو وسوسو ولولو وأبوطويلة شبيه بندق وعبقرينو ومجلة سمير ومن الجاني مع أشرف الشريف وعصام وزيكو وجدو وسمورة ، ولم يكن يحب تان تان كثيرا ولم يعجب بالشياطين التلاتاشر مثل المغامرين الخمسة

أنا من جيل شهد الطوابير على دور السينما لاول مرة في أفلام كينج كونج ثم الفك المفترس وبعدها حمى ليلة السبت وبداية إنتشار ظاهرة جون ترافولتا على أنغام البي جيز قبل طوابير فيلم الزلزال بعدها بسنوات ، ومن جيل تابع أفلام الرجل التخين والرجل الرفيع لتيرانس هيل وبُد سبنسر وأفلام الفرنسيان ألان ديلون وجان بول بولموندو وأفلام بروسلي ووكر الأفعي والرأس الكبير وبداية الافلام الهندية مع رام بال رام والتوأمان وظهور أميتاب باتشان وشاشي كابور وقبلهم الفيل صديقي وعشرين الف فرسخ تحت الماء لكيرك دوجلاس ، أنا من جيل كان يستمع للبي جيز والبوني إم والأبا وتينا تشارلز وظهور مايسمى بموسيقى الديسكو تبعها ظهور الديسكوتيك قبل ان يظهر مايكل جاكسون وجورج مايكل وأغاني الثمانينات وفرق أها ، ووام ، وبيت شوب بويز وديوران ديوران ، ومغنين مثل بروس سبرينجستين وستيفي ووندر وليونيل ريتشي وبوي جورج وبرينس ومغنيات مثل مادونا ووويتني هيوستون وسيندي لوبر

أنا من جيل شهد بدايات محمد منير وعلى الحجار وعمر فتحي ,ونجوم الموسيقى العربية محمد الحلو وسوزان عطية وتوفيق فريد ، ومحمد ثروت (لم يكن محبوبا) ونجم الشباب سمير الإسكندراني وفرق الجيتس والمصريين والفور إم والأصدقاء وقبلهم كانت النجوم الصاعدة كان هناك عماد عبد الحليم وعفاف راضي وكان نجم هاني شاكر قد خفت بشدة قبل أن يكتشف نفسه بأغنية على الضحكاية ، وبعدهم بفترة بدايات سميرة سعيد وعزيزة جلال وميادة الحناوي ولطيفة ، وشهد حكاية بليغ حمدي والمغربية سميرة مليان ... وكانت حديث الجميع لفترة طويلة وكانت الحفلات المذاعة في التلفزيون تحييها وردة أو فايزة أحمد بعد وفاة عبد الحليم ومنع التليفزيون الرقص الشرقي في حفلاته بعدما كانت فقرة أساسية في جميع الحفلات ، وكان نجوم المولونجست أيامها محمود شكوكو وشاهدته على الحقيقة وسيد الملاح وأحمد غانم وأحمد الحداد ونبيل فهمي
أنا من جيل تابع لأول مرة أن تبدأ القناة الأولى الإرسال في العاشرة صباحاً يوم الأحد فقط ومايسمى باليوم المفتوح قبل أن يسموه البرنامج المفتوح ، كان بداية الإرسال دائماً في الثانية ظهرا للقناة الأولى والخامسة عصرا للقناة الثانية ، كان اليوم المفتوح شيئ غير عادي ان نجد التليفزيون يفتح إرساله صباحا وكان يقدم فصل من مسرحية وحلقة من مسلسل مشهور وأغنيات وينتهي الثانية ظهرا بفيلم اليوم المفتوح ابيض واسود ويقدم فقرة عن نجوم الفيلم وبذاكرة جبارة عبد الله احمد عبد الله الشهير بميكي ماوس وقصص حياة أنور وجدي ونجيب الريحاني واسماعيل ياسين ومحمد فوزي ، وطبعا لا ننسى إنقطاع الإرسال كل شوية ولوحة نعتذر عن العطل الفني ونعاود الإرسال حالاً ، وحالاً دي معناها خمس دقايق على الأقل مع حالة من التذمر عندما تكون وقت المسلسل أو الماتش
أنا من جيل كان فيه صابون الوجه هو صابون جيم حداشر وميم اتناشر ويصرف على بطاقة التموين مثله مثل مسحوق الغسيل وكان هناك رابسو وشعاره يغسل بدون مجهود وسافو وشعاره غسيلك اكثر بياضاً وسوبر نيون وماكانش بينضف ، أما الشاي كان هناك فقط شاي التموين وهو إمّا شاي الجمهورية أو مبروك أو شمتو والسمن كانت تسمى مسلي وكان هناك مسلي السلطان والممتاز ، وكانت السجائر كليوباترا في علبة كرتون بها عشر سجائر كل خمس سجائر في صف وتفتح مثل علبة الكبريت وأنواع أخرى مثل الفلوريدا ، وكان الكيروسين يباع بالكوبونات على بطاقة التموين وكانت العطور هي فقط الشبراويشي وقسمة وأنوثة وخمس خمسات ومن الغربي كنا نسمع عن أزارو وأراميس والحريمي كان هناك شانيل نمرة خمسة وفيدجي ، والمياة الغازية كانت سيكوكولا ، وسيكو أفندي بعدما إختفت تدريجيا الإسباتس والسيدر والليمونادة


والى اللقاء فى الحلقة الثالثة وان شاء الله تكون بايد واحد من حضراتكم واكيد هاتكون بايد الاستاذة احبك ولكن.. وده وعد منى...

سنووايت
01-11-2009, 03:40 PM
اخى العزيز محمد اسمح لى باقتراح لسيادتك

بما ان الحلقه الاولى لسيادتكم تم تثبيتها وحرصا منا على التمتع بجمبع الحلقات


لذلك اقترح عليك بدمج جميع الحلقات فى موضوع واحد المثبت حاليا حتى نتمتع من سرد الحلقات تباعا

واسفه على تدخلى

واحييك على هذه الحلقات الرااائعه

مهندس محمد عبد الرحيم
01-11-2009, 03:54 PM
انا ماعنديش مانع يا استاذة سنووووو
انا قلت كده هايبقى افضل بس برده انتم شايفين اكتر منى
الموضوع بتاعكم وانا تحت امركم ومافيش اى مشكلة ابدا
ده حتى انا نفسى باقى الزملاء اللى يحب يعمل حلقة بنفسه عن زكريات هذا الجيل يعملها ويضيفها وانا هاكون سعيد جدا بهذا
""" على فكرة انا رديت رد على موضوع النصائح لتكون اب "" ارجوا ان لا تغضبى منها فانا والله لا ابغى الا المصلحة ولد فيها اى اساءة ممكن حضرتك تحذفيها وانا ماعنديش مسكلة
شكرا لاقتراحك

منى كمال
01-11-2009, 04:36 PM
الله عليك ياباشمهندس

رجعنا لايام زماااااااااااااااان

بس يا استاذنا دي ايام كنا فيها بيبيهات خالص بتاعة كبونات الجاز دي والتموين هههههههه

وشاي مبروكة فاكراه والله كان الكيس بتاعه برتقالي اللون وورق عادي

وفاكرة الاسباتس كانت زجاجة خضرا كبيرة

وفاكرة صابون الغسيل اللى كنا بنبشره علشان نحطه في الغسالة لحد ما شوية شوية اختفى

يااااااااااااه حاجات كتير جدا فكرتنا بيها

شكرا بجد لك

ولى عودة

منى كمال

سنووايت
01-11-2009, 05:21 PM
اخى العزيز واستاذى الفاضل انا لازعل منك ابدا بالعكس انابيعجبنى اراءك جدا وغيرتك على مصلحه البلاد

ثانيا بالنسبه للموضوع حضرتك لو مفيش عندك مانع بتضيف كل حلقه جديده فى نفس الموضوع الاصلى وتغير اسم الموضعيسمى مثلا حلقات انا من هذا الجيل

طبعا انا لا افرض راى ولكنى اقترح هذا لنتمتع بجميع حلقاتك مجتمعه و اى عضو جديد يدخل االعضو الجديد يقراها مكتمله

واكرر اسفه لتدخلى ولكن حتى لا تضيع حلقه من هذه الروائع

واشكرك اخى العزيز لسعه صدرك

جنرال
01-11-2009, 05:25 PM
روعه...روعه.....رووووووووووووووووووووعه

ايه ده ... انا ماشفتش الحلقه الاولى...اروح اشوفها لحسن يفوتنى نص عمرى

ايه يا استاذه منى .. وقعتى نفسك فى مطب ... انتى كانت جدتك بتحكى ليكى عن شاى مبرووكه .. بس انتى مش واخده بالك

مهندس محمد عبد الرحيم
01-11-2009, 06:09 PM
السيدة الفاضلة / استاذة منى كمال
اسعدنى جدا تشريف حضرتك لركن الزكريات
وايام زمان الجميلة
اللى عمرها ما هتتنسى لانها محفورة فى وجدانا
وبالنسبة لموضوع كوبونات الجاز دى كان ليها حكاية معايا كنت ايامها يادوب اربع سنين بس كنت شقى جدا وماحدش يقدر يرفض لى طلب وكان عم فرحات بتاع الجاز كل ما يعدى من الشارع ونشترى منه (ببعض الكوبونات ونكمل بفلوس ساعات) كنت اطلب منه يركبنى معاه العربية اللى بيجرها الحصان لغاية اخر الشارع ويرجعنى تانى ولازم انا اللى امسك اللجام ههههههههههههههه .....
اما شاى التموين فكان احيانا بيتخزن جنب الصابون عند الراجل بتاع التموين ونقعد طول الشهر نشربه غصب عننا وهو صابون تموين والا نشتر بداله من السوق السواء بسعر غالى شوية ههههههه ......كانت ايام
شكرا لتشريفك وياريت تقرائى الجزء الأول هايعجبك جدا
وبرده باكرر الدعوة لو اى حد عايز يعمل حلقة هو عن زكريات الجيل ياريت يشارك بيها الدعوة عامة للجميع وخصوصا حضرتك يا استاذة منى

مهندس محمد عبد الرحيم
01-11-2009, 06:13 PM
الباشا الجنرال حكيم همس
نورت الموضوع يا باشا ..كده تضيع الحلقة الولى
على العموم انا هاعمل الاقتراح اللى قالته الاستاذة سنووووووووو وهادمج كل الحلقات فى موضوع واحد عشان مافيش حاجة تضيع
شكرا يا باشا على تشريفك واهلا بيك فى المشاركة فى ركن الزكريات والزمن الجميل

جنرال
01-11-2009, 06:50 PM
حبيبى الباشمهندس

عندك بعد رؤيه ان مشاركة الاخوه فى عرض الزكريات يعطى قوه للموضوع ويعطى رونق جميل يفكرنا بالزمن الجميل
بس طبعا فى نفس الموضوع كاضافه واثراء له ...وسهولة المتابعه ..ويعطى متعه حقيقيه للقارئ

غادة رشيد
01-11-2009, 07:11 PM
انا الملامين جامد ومتين
حقيقى يا محمد
انت فكرتنى بحجات كتير كنت بحبها
وكنت بحب قوى اسمع المغنيه بتقول بالسلامه يا حبيبى بالسلامه
واول مرة اعرف انها شاديه منك دلوقتى
فكرتنى بذكريات عزيزه وغاليه على
فكرتنى ببيت العيله
لبيت العز يا محمد
الايام الحلوة الصافيه
اللى عمرها ما هترجع تانى

وافتخر وافتخر
انى من ابناء هذا الجيل

عيون الكنانه
غادة رشيد

مدحت زيدان
01-11-2009, 08:46 PM
شكرا ياأبو خالد على أن ذكرتنا بزمن جميل
رغم أنك أصغر مني بأكثر من 10 سنوات الا أنك تنتمي ألى الزمن الجميل ياجميل
بس ليه ماذكرتش أبلة فضيلة وبابا ماجد؟
ولا أنت ماعصرتهمش؟

مهندس محمد عبد الرحيم
01-11-2009, 09:09 PM
شكرا اخى وصديقى مدحت على مرورك الكريم
اكيد هاتلاقى ابلة فضيلة وبابا ماجد فى حلقات قادمة
وبعدين فى الحلقة هنا موجود عمو حسن وانا اصلى كنت بحب الراجل ده جدا وكان داخل دماغى اكتر من ابلة فضيلة بس برده كلهم كانو رائعين
ادخل بقى على الحلقة التانية هاتعجبك برده ان شاء الله

منى كمال
02-11-2009, 02:34 AM
ياغادة اللى كانت بتغنى اغنية بالسلامة ياحبيبي مش شادية ياجماعة

دي نجاح سلاااااام


شكرا يا باشمهندس على دعوتك الجميلة دي

واكيد لازم اشوف الحلقة الاولى ان شاء الله

منى كمال
02-11-2009, 02:37 AM
تمااااااااااام ياجنرال انت كنت معانا وهي جدتي بتحكيلي

ههههههههههههههههههههههههه


بس صدقونى والله فيه حاجات من دي كان عمرى 3 او 4 سنين

وخصوصا الجاز

لكن التموين دا قعدنا كتير ناخده يمكن لحد الابتدائية ولا اكتر

بس طبعا كل فترة المواد التموينية بتتغير

طيب هفكركو بحاجة

جت فترة زيت التموين دا كان والعياذ بالله زي زيت العربيات

طعمه وحش قوي

وبقينا مش نرضى ناخده ونشترى زيت من الغالي

دا التموين دا لوحده حكاية محتاجة لصفحات وصفحات

شكرا يا باشمهندس ولي عودة

احمد الهاشمى
02-11-2009, 02:43 AM
آآآآآآآآآآآآآآآه

جميل ان نتذكرالزمن الجميل

زمن الحكمه والكمال الإلتزام بالعادات والتقاليد

الغربيه ان هذا الزمن كان كل مافيه جميل!

حتي المشاكل كانت جميله

مشكور اخي

بارك الله فيك مهندس محمد

تحياتي

مهندس محمد عبد الرحيم
02-11-2009, 08:37 AM
الستاذة الغالية / غادة رشيد
اسعدنى مرورك جدا
وفعلا مافيش احلى من الزكريات لما نستعرضها جميعا كابناء جيل واحد
وعلى فكرة استاذة منى عندها حق اللى بتغنى بالسلامة يا حبيبى نجاح سلام مش شادية
على فكرة اكيد حضرتك شوفتى الفكرة اللى قالتها الاستاذة / سنوووووووو
ياللا بقى ورينا الهمة وجمعى الموضوعين على بعض
انتى اللى هاتقدرى تعملى كده وتحافظى على المشاركات
لان انا مش هاعرف اعمل الحكاية دى
مشكورة اختنا غادة على المشاركة وياريت ننفذ فكرة الاخت سنوووووووو بسرعة
وبرده الدعوة موجهة لحضرتك لو حبيتى تعملى حلقة خاصة بالزكريات واضافتها للموضوع هاتبقى هايلة
وفى انتظار الحلقة الثالثة يا ترى مين اللى هايكتبها؟؟

مهندس محمد عبد الرحيم
02-11-2009, 08:41 AM
شكرا استاذتنا منى على التوضيح وتصحيح المعلومة
فعلا اللى بتغنى بالسلامة هى نجاح سلام
اما التموين ده ليه حكايات
مرة الشاى ريحته صابون
ومرة الزيت زى الشحم وماينفعش ينطبخ بيه
ومرة الارز شكله غريب
والسوق السودة كانت شغالة علينا الله ينور
بس برده كان زمن كله خير
وكان الاكل ليه طعم انا النهارده
الحاجة غالية جدا ومالهاش طعم
اشكرك على المداخلة
والى اللقاء فى الحلقة القادمة وياترى مين هايتبرع ويكتبها..

مهندس محمد عبد الرحيم
02-11-2009, 08:58 AM
استاذنا الفاضل / احمد الهاشمى
شكرا لتشريف حضرتك للموضوع
وفعلا مافيش احلى من الزمن الماضى خاصة السبعينات والتمانينان
قبل الدش والموبايل والانترنت والحاجات الى شغلتنا حتى عن حياتنا وعن الاستمتاع بيها
شكرا يا استاذنا لمرورك الكريم

مهندس محمد عبد الرحيم
02-11-2009, 09:04 AM
حبيبى الباشمهندس

عندك بعد رؤيه ان مشاركة الاخوه فى عرض الزكريات يعطى قوه للموضوع ويعطى رونق جميل يفكرنا بالزمن الجميل
بس طبعا فى نفس الموضوع كاضافه واثراء له ...وسهولة المتابعه ..ويعطى متعه حقيقيه للقارئ
استاذنا الغالى / جنرال همس
انا اجلت الرد على حضرتك لسبب مهم
انا شايف ان حضرتك مقتنع ان لو الاخوة شاركو فى الموضوع هايكون افضل
ايه رايك تعمل لنا حلقة خاصة عن هذا الزمن الجميل
ياريت ياباشا فكر وقوللى وانا فى انتظار ردك
واشكرك على الاهتمام بالموضوع
والى اللقاء فى الحلقة القادمة التى ارجوا ان تكون بايد احد من الزملاء الأفاضل

جنرال
02-11-2009, 09:51 AM
والله انا طموحى اكتر من كده..انه يتفتح قسم جديد واقترح يكون كان يا مكانمثلا

وكل واحد يعبر عن زمنه اللى فات سواء كان شاب او ناضج او فى الاربعينات او الخمسينات او ما بعد

لانه دايما كلنا كل شوية نحب نرجع لايامنا الحلوه يعنى هيبقى فيه دايما مادة فعاله باستمرار

هناء محمد
02-11-2009, 10:32 AM
انا من هذا الجيل - الحلقه الثالثة ( مهداه الى المهندس / محمد عبد الرحيم )


انا من جيل اتربى على المثاليات فى التعامل مع بعضنا البعض وشتى المعاملات .....فى الصدق والامانه والاحترام والاخلاص والتراحم والاحسان وصلة الارحام وحسن الجوار والصدق ....والتحاور بالحسنى واللين والرفق ....وعدم جرح المشاعر ....ومراعاة الجار والتجاور .

انا من جيل عاش الامان - مكانش يعرف حاجه اسمها كالون باب ولا ترباس مجرد باب موارب واللى عاوز يدخل يدفع الباب باديه ويدخل - انا من جيل كنا نسيب المفتاح عند الجيران لغاية من نرجع من مدارسنا عشان نرتاح -
كنا نتجمع كلنا فى رمضان نعمل الكحك والبسكويت الكل متجمع اللى يعرف واللى ميعرفش نسهر للسحور ونشيل الصاجات ونوديها الفرن ونسهر عليها للصبح كلنا ايد واحده وكلنا اللى عملناه
وفى اول يوم العيد - ناخد الصوانى المحمله ونلف شقه شقة وبيت بيت وكاننأ بنهديهم طب ما كلنا اللى عملينه .

انا من جيل فوازير نيللى عالم ورق وفوازير شريهان وفطوطه وحكايات الف ليلة وليلة بصوت زوزو نبيل الساحر وهى بتقول بلغنى ايها الملك السعيد ذو الرأى الرشيد - انا من جيل اخترنالك كل يوم اربع فى السهرة - وجيل نوتس لاندج ومسلسل فتحى يا زهور بتاعه ماما نجوى وكملت الجزء التانى منه صفاء ابو السعود - ومسلسل ماجد والاغنيه بتاعتها الروعه اللى مش راضيه تروح من بالى ولغايه دلوقتى حفظاها ( انا اسمى ماجد دايما متواجد لعبه خشبية موهبه ربانيه ) وفى الراديو حكايات ابله فضيله ووراها على طول الى ربات البيوت وفى الشرق الاوسط عمو حسن ومسلسل الساعه 5 صابرين واللى كانت بتغنى مقدمته شاديه والصبر فى الملاحات - وكان بردوا فيه مسلسل حلو اوى واجمل مافيه ان تتره كان بصوت ليلى مراد للاسف مش فاكره اسمه بس هو اتعمل فيلم بطولة سهير رمزى ونور الشريف .

ولغاية كده كانت احلى الايام اللى افتقدتها بشده وياريت ياريت ترجع تانى بس ده محال .

جنرال
02-11-2009, 10:39 AM
انتى مش بس اهديتى استاذنا المهندس محمد .. لأ .. انتى اهدتينا كلنا اروع هديه

الله .. ما احلى الى العودة الى الزمن الجميل

هناء محمد
02-11-2009, 10:42 AM
الف شكر عزيزى جنرال
تقبل تحياتى

مهندس محمد عبد الرحيم
02-11-2009, 10:54 AM
لا بقى انا كده هابطل اكتب حلقات انا من هذا الجيل
واشوف لى بقى موضوع تانى
حضرتك خدى الزباين منى .. ههههههههههههه
وطالما مجلس الحكماء اعجب بالموضوع هايبقى فيه ايه تانى
بجد جميلة ولو كنتى طولتى شوية كانت هاتبقى احلى كمان
المرة الجاية بقى عايزين صفحتين
مشكورة اختنا احبك ولكن ,, وبستاذن حضرتك هاندمج الموضوع كله يعنى التلات حلقات وما يستجد فى موضوع واحد عشان بس الناس ماتروحش منها حاجة
ودى بقى هاتبقى خدمة من الاستاذة غادة
سلام والى حلقة جديدة ان شاء الله

هناء محمد
02-11-2009, 11:00 AM
مينفعش يا با شمهندس اكمل ( لا يفتى ومالك فى المدينة ) حضرتك صاحب الفكرة وصاحب اروع موضوع والله - رجعتنا للزمن الجميل
وحلو اوى اللى انا كتبته .
وحضرتك اعمل اللى انت عاوزه لانه موضوعك انت وما انا الا مشارك
تقبل تحياتى

مهندس محمد عبد الرحيم
02-11-2009, 11:03 AM
لا ياعم انا ماليش فى موضوع القسام دى
انا بعيد عن الادارة وعن مجلس الحكماء
انا اصلا زهقان من الادارة والمتابعة والتخطيط والموازنات وجاى المنتدى عشان ارفه عن نفسى
قسم جديد وبعدين مين يبقى مسئول عنه تختارونى
مش هاتشوفونى هنا تانى ههههههههههههههههههههههههههه
خليها كده ماشية حلو واللى عايز يعمل حلقة يدخل ويضيفها
ده راييى وانتم برده اعملوا اللى انتم شايفينه
بس ابعدنى انا عن الادارة والاقسام ههههههههههههههههههه

غادة رشيد
02-11-2009, 11:31 AM
بس بس
ما تتخنقوش
هنعمل انا من هذا الجيل ( محمد عبد الرحيم)
انا من هذا الجيل ( احبك ولكن)
بس عاوزة اعرف الاول
هو انتوا من جيل واحد ولا من جيلين
انا لما قريت لمحمد عبد الرحيم
حسيت انى من نفس جيله
ولما قريت لاحبك ولكن بردوا حسيت انى من نفس جيلها

جاوبونى انتوا بقى
وقولوا لى انا من اى جيل
؟؟؟؟؟؟؟؟؟؟؟

عيون الكنانه
غادة رشيد

مهندس محمد عبد الرحيم
02-11-2009, 11:36 AM
انا هاحول الموضوع لاختنا غادة بقى وهى تنظمه وترتبه بحيث يبقى موضوع واحد مثبت
بس ربنا يعينها كده وتخلص بسرعة انا عارف انها مشغولة
ربنا ييسر

مهندس محمد عبد الرحيم
02-11-2009, 11:39 AM
والله يا غادة وانتى بتكتبى ردك كنت انا باكتب ردى
وبقول هاحول الموضوع لغادة وهى ترتبه
مافيس بقى صدف اكبر من كده
ياللا شدى حيلك ولمى كل المواضيع (الحلقة الاولى والتانية والتالتة ) فى موضوع واحد مثبت عشان مانلخبطش الناس
ياللا شدى حيلك

اسامة الهمساوي
02-11-2009, 12:27 PM
الله الله يااحبك ولكن
والله مااروع ماكتبتيه
مشعايز اقول ان الحلقة بتاعتك غطت على حلقة الباشمهندس محمد رغم انه صاحب فكرة الموضوع
انا كنت بقرأ كلامك وكنت بعيشه لحظة بلحظة ورجعتينى لورا سنين طويلة فى كل كلمة كتبتيها وفكرتينى باصحاب زمان اللى كانو بيشيلو معانا الصاجات واحنا رايحين نوديها الفرن
وفكرتينى لما كنا ناكل الكحك وهو لسة طالع سخن من الفرن وكان طعم الملبن وهو سخن فى منتهى الروعة والجمال
وفكرتينى لما كنا بناكل البسكوت وهو سخن مع الشاى باللبن
وفكرتينى فعلا لما كان الجار بيسيب المفتاح عند جاره ...
وفكرتينى لما يكون فيه فرح او عزاء كانت الشقة المواجهة لشقتك تتفتح على مصراعيها وكان الشقتين شقة واحدة
ياااااااااااااااااااااااااه فكرتينى بايام الشباب واللعب فى الشارع مع اصحابنا واحنا صغيرين
الباشمهندس محمد عنده حق لما قال انا هبطل كتابة وانتى تكتبى
فكرة الباشمهندس محمد صح ان يتم تجميع هذه الحلقات وماقد يستجد من اعضاء اخرى فى موضوع واحد وينسب اصل الموضوع للباشمهندس محمد وممكن اى عضو يتفضل يكتب موضوع داخل هذه الموسوعة الرائعة ....
مبارك ياباشمهندس محمد نجاح فكرة موضوعك
شكرااااااااا احبك ولكن .. على الموضوع الرائع المتميز
وفى انتظار 7 اقلام بتوع لبلب وعنتر

هناء محمد
02-11-2009, 12:31 PM
عزيزتى غاده
زى ما كتبت فى المقدمه احنا من جيل المثاليات - عشان كده هتلاقينا كلنا بنتشابه مع بعض - وهتحسى انك من جيل المهندس محمد وبردوا من جيلى - بس على فكرة الفرق مش كبير اوى كده - تقريبا بس كام سنة بسيطه - انتوا سابقنى بحجات بسيطه - يعنى اللى فاكراه اوى مثلا حادث المنصه كنت حوالى 7 - 8 سنين تقريبا -
تقبلى تحياتى

غادة رشيد
02-11-2009, 12:34 PM
تمام كدا يا اسامه
فكرتك جيده جدا
حالا كنت بفكر فيها
بس يلا نفكر سوا
نسمى الموضوع ايه؟

ايه رايك نسميه
انا من هذا الجيل(دعوة مفتوحه من م/ محمد عبد الرحيم و احبك ولكن)..متجدد لكل الاعضاء

ايه رايكوا انتوا فى العنوان
ياريت يا جماعه تختاروا عنوان حلو ومميز لدمج مشاركات م/ محمد و احبك ولكن
وبعد ان تصلو الى قرار يبقى ندمج المواضيع

تحيتى

عيون الكنانه
غادة رشيد

هناء محمد
02-11-2009, 12:34 PM
هههههههههههههههههههههههه والله العظيم ما فيه اروع منك يا استاذ اسامه - يارب دايما الضحكه وراحه البال ما تفارقك
والله العظيم انت فى همس عامل زى طبق السلطه كله فيتامين ومحدش يقدر يستغنى عنه ابدا - والمحروم منه مفقود
تقبل تحياتى

مهندس محمد عبد الرحيم
02-11-2009, 01:10 PM
اولا ياباشا انت فين
سايب العزى ومش باين
ثانيا انا مش باسخن وبحب النجاح الجماعى وسعيد جدا بالمشاركة الفعالة وعايز اقولك انا اول واحد شهد لموضوع الاستاذة احبك ولكن وقلتلها انك خدتى الزباين
ثالثا انا بقى عايزك تكتب حلقة انت بقى وشوف بقى لما اللواء اسامة (هاى تنشن سابقا) يكتب زكرياته عن الجيل يعنى لا انا ولا اى حد هايقدر يكتب تانى فى الموضوع
مستنيين حلقة من حلقاتك يا باشا ياكبير بس عايزك بقى تغوط فى اعماق المجتمع المصرى وتجيب من الاخر
وفراخ الجمعية واللحوم الفاسدة والمبانى اللى كانت بتقع على اهلها ومعجون حلاقة انجرام ومسلسل على بيه مظهر يا فندم والمراة الخارقة وكونتا كنتى بتاع جزور والراجل اللى كان اسمه اتش ار بتاع المسلسل الاجنبى (مش فاكر اسمه دلوقتى اه كان اسمه دالاس) بص تحبيشة حلوة كده ومش هاوصيك على موضة الستات ده غير بقى موضة الهيبز والبناطيل الشارلستون ... شد حيلك وعايزين نشوف حاجاتك الحلوة فى اطار من المنافسة الشريفة وربنا يبعد عننا شر العين
اما اسم الموضوع انا بقترح يكون (انا من هذا الجيل .. ادخل وشارك بزكرياتك عن الزمن الجميل ) بدون زكر اسامى ده موضوعنا كلنا وزكرياتنا كلنا وياريت يستمر
ده غير بقى ان الجنرال اقترح فكرة اننا نعمل الموضوع قسم جديد ونسميه كان يا ما كان بس انا مش عارف انتم رايكم ايه

احمد الهاشمى
02-11-2009, 02:33 PM
تسلم الايادي

احبك ولكن

فعلا زمن جميل عشناه

ومفتقدينه الان

اؤيدفكرة الدمج

والاسم الجديد

مودتي وتقديري

اسامة الهمساوي
02-11-2009, 04:20 PM
اولا ياباشا انت فين
سايب العزى ومش باين
ثانيا انا مش باسخن وبحب النجاح الجماعى وسعيد جدا بالمشاركة الفعالة وعايز اقوللك انا اول واحد شهد لموضوع الاستاذة احبك ولكن وقلتلها انك خدتى الزباين
ثالثا انا بقى عايزك تكتب حلقة انت بقى وشوف بقى لما اللواء اسامة (هاى تنشن سابقا) يكتب زكرياته عن الجيل يعنى لا انا ولا اى حد هايقدر يكتب تانى فى الموضوع
مستنيين حلقة من حلقاتك يا باشا ياكبير بس عايزك بقى تغوط فى اعماق المجتمع المصرى وتجيب من الاخر
وفراخ الجمعية واللحوم الفاسدة والمبانى اللى كانت بتقع على اهلها ومعجون حلاقة انجرام ومسلسل على بيه مظهر يا فندم والمراة الخارقة وكونتا كنتى بتاع جزور والراجل اللى كان اسمه اتش ار بتاع المسلسل الاجنبى (مش فاكر اسمه دلوقتى اه كان اسمه دالاس) بص تحبيشة حلوة كده ومش هاوصيك على موضة الستات ده غير بقى موضة الهيبز والبناطيل الشارلستون ... شد حيلك وعايزين نشوف حاجاتك الحلوة فى اطار من المنافسة الشريفة وربنا يبعد عننا شر العين
اما اسم الموضوع انا بقترح يكون (انا من هذا الجيل .. ادخل وشارك بزكرياتك عن الزمن الجميل ) بدون زكر اسامى ده موضوعنا كلنا وزكرياتنا كلنا وياريت يستمر
ده غير بقى ان الجنرال اقترح فكرة اننا نعمل الموضوع قسم جديد ونسميه كان يا ما كان بس انا مش عارف انتم رايكم ايه

هههههههههههههههههه
مبارك ياباشمهندس نجاح الموضوع
على فكرة منتديات كتير هتاخد الفكرة دى وهتنفذها بعناوين تانية
انا اقترح ان يكون اسم الموضوع (انا من هذا الجيل .. ادخل وشارك بزكرياتك عن الزمن الجميل )

قمرالزمان
02-11-2009, 04:47 PM
الله الله على احلى ايام

معجون المعاجين

ارتف بالفلورين

والتسويس والتسويس

انا معجون مخصوص علشانكم

انا معجون يحمى اسنانكم

اسمك ايه

معجون المعاجين

ارتف بالفلورين

ههههههههههههههههههههه

والله كان الحال بسيط جدااا

حتى فى اعلانات التليفزيون

يابشمهندس

انت كده حاترجعنا لايام العمر الجميله

لامسئوليه ولا انشغال بال

وبعدين ياجماعه ماله التموين

احم احم نحن هنا

احلى زيت تموين

واحلى سكر مليان ورق وتراب

واجميل باكوشاى فيه نشارة خشب

هههههههههههههه

مافيش احلى من ايام شاى مبروكه يامنمن

والجاز بالكوبون

والعيش على باب الشقه

والزبال يطلع ياخد الزباله من كل الشقق

وبكل احترام بواب العمارة يكلمك

والجيران قلوبها مليانه حب لبعض

والابناء اخوات

يااااااااااه

كان ياما كان

مشكور استاذى باشمهندس محمد

سيدمج الموضوع كله

تحياتى

قمرالزمان
02-11-2009, 04:56 PM
باشمهندس محمد

تم دمج موضوعك وموضوع الاخت احبك ولكن

فى موضوع واحد

وقمت بتعديل الموضوع

حتى يكون فى شكل لائق بالموضوع الرائع

اتمنى ينول اعجاب حضرتك

وبانتظار باقى الحلقات

موضوع متميز جدااااااااا

تحياتى اخى الكريم

احمد مصطفى
02-11-2009, 05:14 PM
شكرا أستاذ محمد على هذا الموضوع


(¯`'•.¸(¯`'•.¸, _________________ , .•'´¯) .•'´¯)
(¯`'•.¸(¯`'•.¸««««««««««««»»»»»»»»»»»¸.•'´¯).•'´¯)
--==>>>---> جزاك الله خيرا و بارك الله فيك <---<<<==--
(_¸.•'´(_¸.•'´««««««««««««»»»»»»»»»»»`'•¸_)'•.¸_)
(_¸.•'´(_¸.•'´¯¯¯¯¯¯¯¯¯¯¯¯¯¯¯¯¯¯¯ `'•.¸_)`'•.¸_)

والله المستعان

مهندس محمد عبد الرحيم
02-11-2009, 06:40 PM
استاذتنا قمر الزمان
دايما صاحبة واجب
فعلا حضرتك من الزمن الجميل
اللى كان فيه الناس بتراعى بعض وبتخدم بعض لله
فين الايام دى
ايه رايك تقدمى حلقة من الحلقات معانا انا واحبك ولكن
والله يا جماعة الموضوع مغرى ولذيذ وسهل
غمض عينك وارجع لزكرياتك واكتب هاتلاقى سعادة ما فيش بعده
مستنى من حضرتك رد

هناء محمد
03-11-2009, 08:54 AM
شكرا استاذ احمد الهاشمى على قراءتك موضوعى
فعلا مفيش احلى من ذكريات الزمن الجميل
تقبل تحياتى

مهندس محمد عبد الرحيم
03-11-2009, 11:35 AM
الاخت قمر الزمان
السادة ادارة المنتدى
فيه حاجة لسة واخد بالى منها دلوقتى بس
حضراتكم غيرتوا اسم الموضوع وده جميل جدا والاسم رائع
بس انتم لسة سايبين الموضوع باسمى (مهندس محمد عبد الرحيم)
الموضوع خلاص مابقاش بتاعى لوحدى
الموضوع بقى ملك لكل الهمساوية
وخصوصا الاستاذة احبك ولكن .. وطبعا كل الزملاء اللى هايعملوا حلقات ويشاركوا بعد كده
ياريت تتصرفوا وتخلوا الموضوع للمنتدى كله واعضاءه
اشكركم ..

قمرالزمان
03-11-2009, 12:00 PM
مهندس محمد

شكرا لحضرتك وللاخت احبك ولكن

كل الود

تحياتى

مهندس محمد عبد الرحيم
03-11-2009, 12:20 PM
اشكر لك اهتمامك سيدتى
جازاك الله خيرا

منى كمال
03-11-2009, 09:15 PM
الله الله عليكم

شكرا احبك ولكن على ذكرياتك الجميلة

وعلى فكرة ياغادة

الجيل 10 سنين يعنى انت واحبك ولكن جيل واحد برضه

واحنا كلنا تقريبا اعمارنا محصورة في ال 10 سنين دول

موضوع اكثر من رائع

منى كمال
03-11-2009, 09:26 PM
فكرتونى بأعلان جميل جدا

فاكرين اعلان


كوفارتينا

لما كانت القطة تسأل صديقها جبت الشبكة جبت الملبس يقولها لا تضربه على راسه

وفى الالاخر قالها ايوا قالته من كوفرتينا هههههههههههههههه


واعلان رمسيس

لما كانوا يسألو عنه

ويقولو يكون بيزور حتشبسوت

دورنا هناك ملقناهوش

مؤكد راح على ابو سمبل

بس خلاص متدوروش

اهو وصل

كنت فين يارمسيس روحت فين يارمسيس

كنت بجيب ايس كريم

منين منين قولي منين

من مصر للالبان

انتاجها في كل مكان

ايس كريم في الصيف بيريحنا وينعشنا

ايس كريم في الشتا بيغذينا وينشطنا

ههههههههههههههههههههههههه

كانت ايام

والاعلانات كانت رائعة
فاكرين اعلان شهادات الاستثمار

فوايدها علينا كتار

واعلان اجري بسرعة ياواد ياحسين تقب وتغطس في دقيقتين شوف لينا ريري بيبتباع فين هات لنا منه باكو واتنين

انا جيت اهنى وشكلي جديد ومعايا فتامين كله حديد ..... دا بالتأكيد ( مش فاكرة الجزء دا هههههه)

ريري جه هل هلاله والكل ...........

جانا ريري جانا

يامشبعنا ومغذينا

ههههههههههه

روعة والله

لي عودة

ذكرى لعيبي
04-11-2009, 03:41 PM
يا سلام على هذا الجيل الرائع
يا الله حتى الذكريات لها طعم آخر يشبه
الحكايا الجميلة وقت المطر والعائلة حول المدفأة
ورائحة البلوط والأعلانات البسيطة والبريئة
ما أجملكم وأنتم تعيدون هذه الذكريات
تقبلو مروري

مهندس محمد عبد الرحيم
04-11-2009, 03:59 PM
شكرا استاذتنا منى على مرورك الكريم
حقيقى كانت ايام جميلة وبسيطة
كان التليفزيون يادوب قناتين نقدر نتفرج عليهم من غير ما نضيع باقى الاهتمامات
وكان بيقدم حاجات جميلة ومحترمة ومن كتر ما حبيناها حفظناها ولسة حافظينها لغاية دلوقتى
فاكرين خمس حروف يتاقلوا بمال
سجال سيجال
فاكرين لما كانو بيتكلمو عن تجهيز البيت
وتقوله هانجيب منين طب ياعنيا
من الاندلس التجارية
انواع كتير من المستورد وهى فى العتبة الخراء
الاندلس التجارية الاندلس التجارية
ولا الاعلان الشهير بتاع خضر العطار
اللى كان بيغنيه عدوية ويقول
من اسوان لراس التين .. عارفين طبعا عارفين
طب الفلفل والكمون والشمر والينسون
وعرفنا العنوان فين ده فى الساغة والحسين
خضر خضر خضر العطار
ولا العربى بالموسكى قبل ما ربنا يفتح عليه وسحان الوهاب من بعد الوان اللخبطة والحبر العال فزبن والوان بوبى الحبوب (العلبة بشلن)
والعربى فاتح فى الموسكى (3) و(12) شارع الموسكى
العربى بالموسكى بالموسكى العربى
كل ده غير بقى ثلاثى اضواء المسرح ولا اقولكم دول عايزين حلقة بحالها ددول اكتر فرقة حبيتها طول حياتى ثقافة وفن واحترام وبدون ابتزال
اوعدكم بحلقة كاملة عنهم
اشكركم على المشاركة الفعالة والى حلقة جديدة بايديكم باذن الله

غادة رشيد
04-11-2009, 04:03 PM
منى باين عليه كانت بتحب ريرى قوى
كلام فى سرك يا منى
انا لما كنت بعمل ريرى لاخواتى الصغيرين
كنت بحب اذوقه
وكان طعمه حلو خالص
وقال ايه العبال ما يرضوش يكلوة
كنت بفرح قوى
لانى فى النهايه
انا اللى كنت بكله
هههههه

كمان كلام فى سرك يا منى
انا بحب السريلاك قوى
بس اللى بالحليب بس
الفواكه والخضار لا

مش عارفه دا يبقى ايه؟؟
طفاسه ولا ايه؟
بس كانت كل حاجه زمان لها طعم وريحه
دلوقتى
فين كل دا
راااااااااااااااااااااااح
زى الزمن الجميل ما راح
واخد معاه كل حاجه حلوة

غادة

احمد الهاشمى
04-11-2009, 04:14 PM
هههههههههههههههههه

انا فضلت اكل من ريري لحد مابقيت شاب

هههههههههههههههه

احمد الهاشمى
04-11-2009, 04:17 PM
فاكرين مسلسل

مارد الجبل؟

والدوامه؟

قد ايه كانت كل حاجه ليها طعم تاني

مهندس محمد عبد الرحيم
04-11-2009, 04:17 PM
يا سلام على هذا الجيل الرائع
يا الله حتى الذكريات لها طعم آخر يشبه
الحكايا الجميلة وقت المطر والعائلة حول المدفأة
ورائحة البلوط والأعلانات البسيطة والبريئة
ما أجملكم وأنتم تعيدون هذه الذكريات
تقبلو مروري

الأديبة الرائعة والشاعرة المميزة
الاستاذة / زكرى لعيبى
اشكر لحضرتك مرورك الكريم
وارجوا ان يكون الموضوع حاز اعجابك واحب اسال حضرتك سؤال هل لاحظتى اختلاف بين زكرياتنا كمصريين وزكرياتك كواحدة من بلد عربى شقيق
واوجه لحضرتك الدعوة لعمل حلقة خاصة عن زكريات هذا الجيل ولكن من العراق الشقيق
ياريت حضرتك تساهمى بهذه الحلقة وهاتكون فعلا ممتعة ونتعرف فيها على اوجه التشابه والاختلاف بين الزكريات فى البلدين
متظر من حضرتك وعد بالمشاركة:icon79::icon79:

ذكرى لعيبي
04-11-2009, 07:07 PM
أستاذ محمد عبد الرحيم
هناك اوجه تشابه وفروقات وطبعا لكل بلد ولكل شخص ذكريات
ان شاء الله بعد ان اسافر واعود اعمل حلقة
شكرا لمحبتكم
تقديري

غادة رشيد
04-11-2009, 07:54 PM
ان شاء الله تروحى وترجعى بالسلامه
حبيبتى ذكرى
ولا تنسى تبلغى سلامنا لكل الاهل بالعراق

عيون الكنانه
غادة رشيد

مهندس محمد عبد الرحيم
04-11-2009, 09:17 PM
فاكرين مسلسل

مارد الجبل؟

والدوامه؟

قد ايه كانت كل حاجه ليها طعم تاني

استاذنا احمد
شكرا على مرورك الجميل
وبقول لحضرتك
فعلا كان هناك مسلسلات جميلة تركت لنا زكريات عزيزة
فاكر مسلسل بابا بابا عبده
والمسلسل الاجتماعى الاكثر من رائع بتاع ورده ( اوراق الورد)
طيب فاكر بقى المسلسل بتاع البرادعى
اعدنا ثلاثين حلقة عشان نعرف مين البرادعى
وفى الاخر لقيناه بيدور على اسلحة الدمار الشامل فى العراق
شكرا يا باشا على تشريفك وزى ما بقول لكل الناس اللى بيشاركو معانا ياريت حضرتك تعمل حلقة خاصة بيك وتقول فيها الزكريات الجميلة الخاصة والعامة واللى تفكرنا بالزمن الجميل
فكر وقوللنا امتى؟؟

منى كمال
04-11-2009, 09:29 PM
حبيبتي غادة

والله مش بحب الريري ههههههههه

بحب السيريلاك اكتر ههههههههههههه


بس كنت بحب الاعلانات دي قوي وكانت بتشبك معايا

يمكن لانها كانت بتتردد كتير


بالنسبة للمسلسلات

فعلا كان فيه مسلسلات اكثر من رائعة

فعلا مارد الجبل ومسلسل الدوامة روعة

ومسلسل على باب زويلة كان خطير ومنه عرفنا طومان باي والسلطان سليم الاول قبل ما ندرسه

ومسلسل لا اله الا الله كان اكثر من رائع وكانت بتغنى المقدمة ياسمين الخيام

وكان بيتكلم عن دخول الاسلام مصر

وعلاقة مصر بالاديان

وبعده مسلسل محمد رسول الله وكان بيتكلم عن انتشار الاسلام في العالم العربي

كانت مسلسلات لها مغزى وكنا دايما بنتعلم منها حاجة سواء على المستوى الاجتماعي او الثقافي او التاريخي

مسلسل طه حسين كان اكثر من رائع

ورغم كدا كانت المسلسلات عدد حلقاتها صغير واكبر مسلسل 30 حلقة وكان بيبقى جزئين

لى عودة

ساندى
04-11-2009, 09:39 PM
الأخ العزيز..مهندس محمد
الأخت العزيزة..احبك ولكن

رجعتونى لايام جميلة..أنا ايضا من هذا الجيل..

الساعة الخامسة تماما..تبدا اذاعة ام كلثوم..اعمل كوب الشاى وابدا المذاكرة..

واجمل برامج الاذاعة ايام الاجازة اتابعها..يا ترى انت فين يا مرزوق..أنت فى بحر الظلومات يا لطيف اللطف يا رب...

وعلى بابا والاربعين حرامى..ويا سلام سلم هى القدر بتتكلم؟؟؟

وعوف الأصيل..ومال وشك اصفر ليه يا عكر..

وعواد باع ارضه يا اولاد...وشوف شوف الدندرمة..

وكان هناك فى اذاعة صوت العرب كل يوم برنامج مختلف..من مكتبة فلان..واغانى وعجبانى..وحوارنا المفتوح..

وحلقات الف ليلة وليلة..وموسيقاها المشهورة..وصوت زوزو نبيل..وعبد الرحيم الزرقانى...

ونتقابل بكرة مع عمو حسن بإذاعة الشرق الاوسط الرابعة والثلث يوميا بالتمام...وبعدها برنامج الشارع الغربى..والمسلسل اليومى..


وغنوة وحدوته بقى دى كنت مدمناها..انتظر ان ينتهى برنامج ربات البيوت..واستعد للحدوته

فعلا ايام الزمن الجميل...

هناء محمد
04-11-2009, 09:43 PM
طب فاكرين يا جماعه مسلسل الف ليلة وليلة بطولة نجلاء فتحى وحسين فهمى كان تحفه واجمل ما فيه بساطته - لان شريهان فى الوقت ده كانت بتحب البهرجه اوى وكل سنة كانت بتخلينا هنتجنن على فساتينها - ولا مسلسل على الزيبق بطولة فاروق الفيشاوى - بس الاحلى منهم كانت مسلسلات الاذاعة مش عارفه ليه كانت بتشدنى اوى اتابع حلقات صابرين والصبر فى الملاحات وياعينى ع الدنيا بصوت ليلى مراد الساحر وشنطة حمزه - وسلامه اهلا سلامة نجيب قهوة كده كويس نجيب شلته عشان ترتاح - كده مرتاح لاقهوة ولا شاى بطولة شويكار وفؤاد المهندس وعبد المنعم ابراهيم
والله كانت ايام .

مدحت زيدان
04-11-2009, 09:48 PM
بمناسبة الاعلانات
وأنا شاب كان فيه حتة بنت أجنبية عاملة اعلان خطير
البنت قاعدة على السرير ويدخل عليها جوزها فجأة
تروح البنت مخبية حاجة ورا ضهرها وهى مرعوبة
جوزها يقول لها؟
جيزا بيلا ....وات از زيس
تروح هى مخرجة تقريبا (روج) وتقول له
أت أز مام
يفرح قوى ويقول لها ...مام؟
تقوله ...ياس أتز مام

كنا نقعد نحلم بالاعلان ده
حاليا اعتقد لو نزلوا الاعلان ده هيكون عادى
لان البنات الحلوة كترت

مهندس محمد عبد الرحيم
05-11-2009, 10:44 PM
طب فاكرين يا جماعه مسلسل الف ليلة وليلة بطولة نجلاء فتحى وحسين فهمى كان تحفه واجمل ما فيه بساطته - لان شريهان فى الوقت ده كانت بتحب البهرجه اوى وكل سنة كانت بتخلينا هنتجنن على فساتينها - ولا مسلسل على الزيبق بطولة فاروق الفيشاوى - بس الاحلى منهم كانت مسلسلات الاذاعة مش عارفه ليه كانت بتشدنى اوى اتابع حلقات صابرين والصبر فى الملاحات وياعينى ع الدنيا بصوت ليلى مراد الساحر وشنطة حمزه - وسلامه اهلا سلامة نجيب قهوة كده كويس نجيب شلته عشان ترتاح - كده مرتاح لاقهوة ولا شاى بطولة شويكار وفؤاد المهندس وعبد المنعم ابراهيم
والله كانت ايام .

شريكتى فى الموضوع .. الاستاذة احبك ولكن
مين يقدر ينسى الف ليلة وليلة بطولة نجلاء فتحى وحسين فهمى دى احلى معالجة للقصة وكانت معمولة بطريقة فنية جميلة جدا خاصة المقدمة اللى كانت بصوت سميرة سعيد (احكى ياشهرزاد) كانت اغنية رائعة جدا جدا بس بصراحة ما كنتش بحب شريهان وهى كانت بتقول كريمااااااااا وحاليمااا وفاطيمااااااااااااا لان طبعا نيللى كانت مغطية على الكل وكانت رائعة واللى كان اروع بقى فوازير رمضان اللى كان بيعملها ثلاثى اضواء المسرح اللى انا كنت متيم بيهم بس ما اعتقدش انك شوفتى الفوازير دى وكانو بيغنو فى المقدمة (فوازير رمضان ايوحا) وطبعا مسلسل الشرق الاوسط على الفطار والمذيعة بتقول تبدا حالا مسلسلة رمضان
كانت مسلسلات رائعة ومعظم مسلسلات رمضان اصبحت افلام بعد كده تقريبا كلها اتعملت افلام من ايام فؤاد المهندس شنبو فى المصيدة مرورا بافواه وارانب والشك يا حبيبى وصابرين والصبرفى الملاحات ولغاية دلوقتى لما نسمع مقدمة مسلسل صابرين وشادية بتغنى (والله يا زمن ... لا بادينا زرعنا الشوك .. والله يا زمن ) بيجيلنا احساس غريب مش اقدر اوصفه بالكلام ... فين الابداع ده دلوقتى
واسيبك بقى تكملى ... باقى الزكريات الجميلة فى الزمن الجميل.. وياترى مين هايعمل الحلقة الرابعة؟؟؟

مهندس محمد عبد الرحيم
05-11-2009, 10:52 PM
بمناسبة الاعلانات
وأنا شاب كان فيه حتة بنت أجنبية عاملة اعلان خطير
البنت قاعدة على السرير ويدخل عليها جوزها فجأة
تروح البنت مخبية حاجة ورا ضهرها وهى مرعوبة
جوزها يقول لها؟
جيزا بيلا ....وات از زيس
تروح هى مخرجة تقريبا (روج) وتقول له
أت أز مام
يفرح قوى ويقول لها ...مام؟
تقوله ...ياس أتز مام

كنا نقعد نحلم بالاعلان ده
حاليا اعتقد لو نزلوا الاعلان ده هيكون عادى
لان البنات الحلوة كترت

استاذنا مدحت الغالى
شكرا لمرورك والمشاركة الرائعة
على فكرة الاعلان ما كانش روج ده كان مزيل عرق وبالبلية الدوارة وكانت لسة موضوع البلية الدوارة ده اختراع جديد
على فكرة انت برده فكرتنى باعلان باك .. اسرة كده بتتكلم عن حاجة والاب بيقول باك بتاعى .. وبعدين الام وبعدين الولاد وفى الاخر يقولوا باك بتاعنا كنا وبرده كان مزيل عرق
ولا اعلان لاكتويال I like it برده كان اعلان لذيذ جدا مع اننا عمرنا ما شفنا لاكتويال ده ولا استعملناه ولا برده استعملنا بك ولا مام وكنا فاكرين انه مخصوص لناس معينة هما يستعملوه واحنا كفاية علينا الاعلانات وكانت ماشية زى الفل
اشكرك استاذى مدحت وبرجاء المشاركة مرة ومرات

مهندس محمد عبد الرحيم
05-11-2009, 11:06 PM
الأخ العزيز..مهندس محمد
الأخت العزيزة..احبك ولكن

رجعتونى لايام جميلة..أنا ايضا من هذا الجيل..

الساعة الخامسة تماما..تبدا اذاعة ام كلثوم..اعمل كوب الشاى وابدا المذاكرة..

واجمل برامج الاذاعة ايام الاجازة اتابعها..يا ترى انت فين يا مرزوق..أنت فى بحر الظلومات يا لطيف اللطف يا رب...

وعلى بابا والاربعين حرامى..ويا سلام سلم هى القدر بتتكلم؟؟؟

وعوف الأصيل..ومال وشك اصفر ليه يا عكر..

وعواد باع ارضه يا اولاد...وشوف شوف الدندرمة..

وكان هناك فى اذاعة صوت العرب كل يوم برنامج مختلف..من مكتبة فلان..واغانى وعجبانى..وحوارنا المفتوح..

وحلقات الف ليلة وليلة..وموسيقاها المشهورة..وصوت زوزو نبيل..وعبد الرحيم الزرقانى...

ونتقابل بكرة مع عمو حسن بإذاعة الشرق الاوسط الرابعة والثلث يوميا بالتمام...وبعدها برنامج الشارع الغربى..والمسلسل اليومى..


وغنوة وحدوته بقى دى كنت مدمناها..انتظر ان ينتهى برنامج ربات البيوت..واستعد للحدوته

فعلا ايام الزمن الجميل...

الصديقة / الدكتورة ساندى
اسعدنى جدا مرور حضرتك
وسعيد اكتر ان الموضوع عجبك
فعلا كانت الاذاعة فى الوقت ده ليها بهجتها وكانت بتمثل جزء كبير جدا من حياتنا
وحضرتك فاكرة معظم البرامج اللى كانت بتجذبنا بس افكرك ببرامج جميلة تانية زى برنامج شاهد على العصر لعمر بطيشة البرنامج ده كان خطير جدا وبرنامج تحت العشرين ده غير بقى البرامج الغنائية اللى حضرتك زكرتيها عوف الاصيل والدندرمة وكمان على بابا والاربعين حرامى ومرجانة واخوه قاسم وياسلام على احلى صوت قدم برامج الاطفال واللى كلنا تربينا عليه الصوت الجميل صوت ابلة فضيلة فى غنوة وحدوته الناس دول عمرهم ما هيتكرروا اتحدى اى واحد دلوقتى انه يميز مذيع او مذيعة من صوته ويمكن كمان ممثل او ممثلة دول كانو عباقرة فى عصرهم
شكرا استاذة ساندى على مرورك ونرجوا تكرار اللقاء خاصة وانه لسة فيه حلقات جاية كتير عن زكرياتنا فى الزمن الجميل

مهندس محمد عبد الرحيم
06-11-2009, 06:50 AM
منى باين عليه كانت بتحب ريرى قوى
كلام فى سرك يا منى
انا لما كنت بعمل ريرى لاخواتى الصغيرين
كنت بحب اذوقه
وكان طعمه حلو خالص
وقال ايه العبال ما يرضوش يكلوة
كنت بفرح قوى
لانى فى النهايه
انا اللى كنت بكله
هههههه

كمان كلام فى سرك يا منى
انا بحب السريلاك قوى
بس اللى بالحليب بس
الفواكه والخضار لا

مش عارفه دا يبقى ايه؟؟
طفاسه ولا ايه؟
بس كانت كل حاجه زمان لها طعم وريحه
دلوقتى
فين كل دا
راااااااااااااااااااااااح
زى الزمن الجميل ما راح
واخد معاه كل حاجه حلوة

غادة

انا بقى ما كنتش بحب الرير ابدا وكمان السريلاك كان لسة ما اتعملش على ايامنا
بس كنت باحب اعلان ريرى ده موووت خصوصا وهما محزمين الببرونة وعمالة ترقص والاغنية شغالة
يا مشبعنا ومغذينا يامروقنا ومهنينا .. البركة فى ريرى يا ضى العين
على زكر الببرونة فاكرين الببرونة هناء وشرين
الاختين الحلوين يا ترى هما فين دلوقتى
اطلبنى من ماما واطلبنى من بابا تلاقيهم فى الاجزخانات الختين الحلوين هناء وشرين هناء وشرين..
ولغاية دلوقتى انا برده مش عارف ايه الفرق بين الاتنين .. ياريت لو حد يعرف يقولنا
شكرا استاذة غادة على مرورك الكريم وعايزين بقى زكرياتك عن الاذاعة والتليفزيون والبرامج القديمة الجميلة اللى لسة ليها زكريات معاكى:icon79::icon79::icon79:

احمد الهاشمى
06-11-2009, 07:03 AM
طبعا فاكر البرادعي

بأمارة

أنا البرادعي يارشدي

ههههههههه

كان جميل برضه المسلسل

وان شاء الله

ناوي اكتب حلقه

كان ياماكان

انتظرني

مهندس محمد عبد الرحيم
07-11-2009, 07:47 AM
طبعا فاكر البرادعي

بأمارة

أنا البرادعي يارشدي

ههههههههه

كان جميل برضه المسلسل

وان شاء الله

ناوي اكتب حلقه

كان ياماكان

انتظرني
شكرا اخى العزيز / استاذ احمد الهاشمى
على مرورك الكريم
وان شاء الله تكون حلقة موفقة وتعجب الجميع
بس وعد من حضرتك الحلقة تنشرها هنا فى نفس الموضوع مش موضوع جديد
تمنياتى بالتوفيق

جنرال
07-11-2009, 08:30 AM
حبيبى الباشمهندس محمد

لا ادرى كيف تسترجع كل هذه الزكريات .. المهم انك بتقدر .. عشان نستمتع بهذا الزمن الجميل

والله انته روووووووووووووووووووووعه وما بعدها روعه

بارك الله فيك يا باشمهندس

مهندس محمد عبد الرحيم
07-11-2009, 10:43 AM
جازاك الله خيرا اخى العزيز جنرال
صدقنى انا ساعات كتير باحس ان انا لسة عايش فى الماضى
خصوصا لما الواحد بيشوف اللى بيجرى الايام دى
شباب مش على مستوى المسئولية واحداث غريبة ومؤلمة حتى الفنون اللى كانت بتخفف شوية عننا اصبحت سلعة تجارية لا هم للمسئولين عنها الا الربح والربح فقط
فتلاقينى كده اهرب من الواقع ده وارجع اعيش فى الماضى عشان اقدر اكمل المسيرة
شكرا يا باشا وفى انتظار زكرياتك من الزمن الجميل

اسامة الهمساوي
10-11-2009, 03:32 AM
والله فكرتونا بالذى مضى
وفين ايام المعلم رضا فى مسلسل رضا بوند
ههههههههههههههههههههههههه
وفين افواه وارانب
وكان فيه مسلسل لفؤاد المهندس وشويكار ايام رمضان 1973 كان اسمه اه يانافوخى .. هضرب راسى فى اتخن حيطة
بس المسلسل ده اتوقف لظروف حرب اكتوبر 73
قول للزمان ارجع يا زماااااااان
ياخسارة على الايام الجميلة ياولاد
الف خساااااااااااااارة على الزمن الجميل

مهندس محمد عبد الرحيم
10-11-2009, 04:00 PM
والله فكرتونا بالذى مضى
وفين ايام المعلم رضا فى مسلسل رضا بوند
ههههههههههههههههههههههههه
وفين افواه وارانب
وكان فيه مسلسل لفؤاد المهندس وشويكار ايام رمضان 1973 كان اسمه اه يانافوخى .. هضرب راسى فى اتخن حيطة
بس المسلسل ده اتوقف لظروف حرب اكتوبر 73
قول للزمان ارجع يا زماااااااان
ياخسارة على الايام الجميلة ياولاد
الف خساااااااااااااارة على الزمن الجميل


معقولة الباشا منور الموضوع عندنا
وحياة برحوما فى نمته ولا ان شاء الله اعدمه
انا فى غاية السعادة من تشريفك يا باشا
فكرتنى بالمعلم رضا بوند
بس برده محمد رضا كان عامل شغل جامد فى التليفزيون فى رمضان
فاكر المعلم عكاشة عماشة صاحب محلات الفراشة
وكان معاه سيد زيان وفاروق فلوكس ومحمود التونى
طبعا انتم لسة صغيرين وما تفتكروش المسلسل ده
وكان فيه جملة خطيرة جدا بتنقال فى المسلسل ده فى شكل نشيد وطنى ايام حرب اكتوبر
محمد افندى رفعنا العلم .. وطولت راسنا ما بين الامم

وبالنسبة للمسلسلات اللى كانت فى رمضان ايام الحرب كان فيه مسلسل بتاع عبد الحليم حافظ وعادل امام وسعاد حسنى وكان بيغنى المقدمة بتاعته عبد الحليم حافظ وبقول
ماشى فى طريق من كام سنة ماشى فى طريق... تعب الطريق ما تعبت انا ماشى فى طريق
بس المسلسل ده بعد كده كملوه واتعرض تانى
ها بقى اسال لك على المسلسل بتاع فؤاد وشويكار كمل ولا لا
وشكرا يا باشا على تشريفك وانتظر الحلقة الرابعة قريب ان شاء الله
***** سؤال .. بجد حد لسة فاكر مسلسل المعلم عماشة عكاشة بتاع محمد رضا ولا انا بس اللى فاكره ؟؟؟؟

عادل شاكر
10-11-2009, 05:12 PM
أخى الغالى

مهندس محمد

لقد أرخت لتلك الحقبة فنياً كأروع ما يكون

ولكنى سأدخل معك من باب آخر

فأنا أقدم منك بهذا الجيل

نحن من جيل إنحنى وقبل أيادى آباءنا وأمهاتنا والجدود

بكل الفخر وعزة النفس (و الجيل الحالى يعتبر ذلك ذلاً وإنكسارا)

أنا من جيل التعليم الفعلى وإحترامنا المعلمين وإجلالهم

ولسنا من جيل مدرسة المشاغبين

نحن من جيل اليوم المبروك الذى كانت ساعاته تعادل أربع

أيام بالتوقيت الحالى والمحلى

نحن من جيل الحياء للرجال والنساء كشعبة من شعب الإيمان

نحن من جيل يقدر ملمس الورق ونلتهم بعيوننا أى كتاب نافع

نحن جيل القناعة والفرح والسرور

من جيل النكتة والضحكة من القلب

كان على أيامنا الصداقات الأصيلة بلا غرض ولا مرض

كنا أصحاء النفس والبدن

كان لكل شيىء لون وطعم

الخضروات والفاكهة واللحوم والطيور والأسماك

كنت بمدرسة نور الإسلام لتحفيظ القرآن الكريم

كان مصروفى نكلة 2 مليم وأخرج من بيتى الكائن بآخر

شارع السد بالسيدة زينب وبالجوار بقالة عم عبدة أشترى بمليم

رغيف بحجمه الطبيعى قبل التخفيضات وبحشوه الحلاوة الطحينية

أو الجبن بالخيار والطماطم وبالمليم الثانى أشترى وأملأ جيوبى

بالحلوى كان عددنا بالفصل الواحد حوالى خمسة عشر وكان

الوقت براحاً وممتداً وعقارب الثوانى أبطأ من عقارب ما نحن فيه الآن

كان الترام الأصفر المفتوح الجوانب يقف على المحطة وينزل المحصل

ويساعد الركاب فى تحميل ما معهم من متاع وأطفال وعندما يجلس

الجميع يطلق نفيره إيذاناً بالتحرك البطىء بطء الزمن فى نعومة

وسلام وكان الحب طاغياً ومسيطراً على كل الخلائق وكان قلوبنا تنفطر لآلام

الآخرين وما هم من باقى أهلينا كان فقراً وحناناً ووطنية وكرامة وعزة

نفس وإباء وكراهةً للضيم والذل والهوان

كنا شعباً واحداً

وأصبحنا سكاناً ولنا (وزارة الصحة والسكان)

كنا نعشق تراب الوطن ومستعدين لفدائه

وأصبحنا الآن آكلوه فى رغيف الخبز المعجون بالرمال

مع خالص التحية عزيزى المهندس لإتاحة تلك المساحة

الجميلة لى لأنثر عليها بعض الذكريات

مهندس محمد عبد الرحيم
11-11-2009, 09:14 AM
استاذنا الغالى / عادل شاكر
اسعدنا تواجدك معنا ومشاركتك الجميلة بكريات عن الزمن الاجمل
ان كان زماننا هو الزمن الجميل
فاكيد زمانكم كان الزمن الاجمل

واسمح لى ان اقتبس بعض من عباراتك عن الزمن الاجمل

نحن من جيل اليوم المبروك الذى كانت ساعاته تعادل أربع أيام بالتوقيت الحالى والمحلى
كان الوقت براحاً وممتداً وعقارب الثوانى أبطأ من عقارب ما نحن فيه الآن

وحقيقى لم يعد هناك بركة فى الوقت واليوم يمر كانه ساعة

كنا أصحاء النفس والبدن
كان لكل شيىء لون وطعم
الخضروات والفاكهة واللحوم والطيور والأسماك

ودلوقتى الاكل كله هندسة وراثية وكيماويات ومواد مسرطنة
وما عدتش اى حاجة ليها طعم ابدا ابدا ابدا
ربنا يرحمنا
شكرا استاذى على مرورك الكريم الذى عطر صفحاتنا ورجعنا للزمن الاجمل والاروع

مجدى ابن النيل
20-11-2009, 01:05 AM
أستاذ محمدعبد الحيم فكرتنى بالزمن الجميل
رجعت خمسين سنة
وقتما دخل التلفزيون مصر فى الستينات بنجوى أبراهيم وليلى رستم
وحمدى قنديل وأحمد سمير وفوازير ثلاثى أضواء المسر ح سمير وجورج والضيف أحمد
والمسلسلات الرئعةمثل خيال الماتة والضحيه والرحيل والنصيب وبنت الحته 00 إلخ
وأحتفلات الثورة والأغانى الوطنية الجميلة وأحتفالات المدارس بذلك
وحفلة أم كلثوم فى الخميس الأول من كل شهر وتنظيم الحفلوسرية الأغنية
التى توزع فى جميع أنحاء الوطن العربى ولاتسمع ولا يعرف أحد محتوى الأسطونات
إلا بعد صعود كوكب الشرق المسرح وبدء الغناء
وصرع الغناء بين فريد الأطرش وعبد الحليم حافظ ليلة الربيع من كل عام
لقاء السحاب بين ثومة وعبد الوهاب
أعلانات ست سنية سيبه الميه سيبه فى الحنفيه وأعلان أخون غبور
أيام ما كان هناك رسم يسدد على كل أريال تلفزيون على سطح العمارة
الزكريات كثيرة والحكايات جميلة
لى عوده

مهندس محمد عبد الرحيم
07-12-2009, 04:18 PM
أستاذ محمدعبد الحيم فكرتنى بالزمن الجميل
رجعت خمسين سنة
وقتما دخل التلفزيون مصر فى الستينات بنجوى أبراهيم وليلى رستم
وحمدى قنديل وأحمد سمير وفوازير ثلاثى أضواء المسر ح سمير وجورج والضيف أحمد
والمسلسلات الرئعةمثل خيال الماتة والضحيه والرحيل والنصيب وبنت الحته 00 إلخ
وأحتفلات الثورة والأغانى الوطنية الجميلة وأحتفالات المدارس بذلك
وحفلة أم كلثوم فى الخميس الأول من كل شهر وتنظيم الحفلوسرية الأغنية
التى توزع فى جميع أنحاء الوطن العربى ولاتسمع ولا يعرف أحد محتوى الأسطونات
إلا بعد صعود كوكب الشرق المسرح وبدء الغناء
وصرع الغناء بين فريد الأطرش وعبد الحليم حافظ ليلة الربيع من كل عام
لقاء السحاب بين ثومة وعبد الوهاب
أعلانات ست سنية سيبه الميه سيبه فى الحنفيه وأعلان أخون غبور
أيام ما كان هناك رسم يسدد على كل أريال تلفزيون على سطح العمارة
الزكريات كثيرة والحكايات جميلة
لى عوده

استاذنا الفاضل
الشاعر الهمام / مجدى بن النيل
اشكرك على مرورك الكريم والذى اعاد الحياة للموضوع بعد ان كاد يموت
ومازالت للذكريات بقية
ومازلنا مع ايام الزمن الجميل
زمن الحب والود والبساطة فى كل شىء
عندما كان الناس ياكلون معا من طبق واحد ولا يخشون شيئا
والان هجر الاخ اخوه وترك الصديق صديقه
ولم تعد الايام صافية ولا الليالى دافئة
فين ايام زمان زمن الحب الجميل
شكرا يا باشا على مرورك والى لقاء قريب

مهندس محمد عبد الرحيم
23-12-2009, 01:48 PM
مشكورة استاذة منى على وضعك للموضوع ضمن فعاليات المنتدى
دى مجاملة رقيقة وتقدير كبير من حضرتك
وان شاء الله هايكون فيه حلقات جديدة قريب ان شاء الله
اشكرك سيدتى

مهندس محمد عبد الرحيم
19-01-2010, 11:54 AM
أنا من جيل شهد المنافسة المتعصبة على الدوري والكأس بين مشجعي الأهلي والزمالك وكانت المبارايات تذاع يوم الجمعة فقط عصراً وليس مساءاً من الإستاد وكان وقتها إسمه إستاد ناصر قبل أن يعدلوا إسمه إلى إستاد القاهرة ، أنا من جيل شهد طاهر الشيخ والخطيب ومصطفي عبده ومصطفي يونس وثابت البطل ومحسن صالح وفتحي مبروك وإكرامي وشريف عبد المنعم ومن الزمالك حسن شحاتة وفاروق جعفر وعلى خليل وعادل المأمور وكان يستمع للتعليق بصوت محمد لطيف قبل علي زيوار وحسين مدكور ثم بعدهم أحمد عفت وعلاء الحامولي وبين الشوطين كان هناك رقصة السمسمية لفرقة رضا مع عايدة رياض ومشيرة إسماعيل أو جزء من الليلة الكبيرة قبل أن يحل محلها سداسي شرارة بقيادة عطية شرارة ، وجيل لم يكن يعرف مدرباً للاهلي غير المجري هيدكوتي (مش طارق المجرى الهمساوى) ، ومحمد نوح يغني مع الجماهير في الإستاد في المباريات الوطنيه ، وبعدها بسنوات شاهدت فوز محمد رشوان بفضية الجودو بدورة لوس انجلوس وكيف لم يقوم بالتغلب على بطل العالم الياباني المصاب بقدمه اليسرى ورفض أن يلعب عليها حتى خسر الذهبية ولكنه كسب إحترام العالم ، أنا من جيل كان يتابع مباريات التنس في رولان جاروس وويمبلدون بصوت المعلق الجميل عادل شريف اللى حببنا وفهمنا يعنى ايه تنس ونجوم مثل بيورن بورج وجون ماكنرو وكريس إيفرت ومارتينا نافرا تيلوفا قبل ظهور المشاغب بوم بوم او بوريس بيكر ، ونجوم مثل ناديا كومانتشي في الجمباز قبل أن تظهر الأمريكية ماري لو والعداء مايكل لويس والروسي سيرجي بوبكا وهو يتخطى حاجز الستة أمتار بالقفز بالزانة والعداءة الحافية الجنوب افريقية زولا بد ، وسعيد عويطة ونوال المتوكل من المغرب ، وكاربوف وكاسباروف في الشطرنج وعقدة شمال افريقيا وماتشات تونس وهدف الخطيب وحارس المرمى المغربي بادو الزاكي والجزائري الأخضر بللومي الذي مُنع من دخول مصر بعد تعديه على الجماهير والشرطة وطبيب مصري أفقده عينه ، والمدرب العراقي عمو بابا ومجلة الصقر القطرية بطبعتها الأنيقة وسعرها الزهيد



أنا من جيل كان جمال الفتاة في أناقتها ، لم تكن ترتدي الجينز والبودي والبلوزة ولكن كان هناك الفستان والتايير والشنطة من نفس لون الحذاء والمكياج كاملا وهادئا ، ولم يكن هناك تحرش جنسي وكانت المعاكسات غير فجة وأنيقة وآخر أمل للشاب أن يتحدث مع فتاة ، ولم تكن الفتاة جريئة وتقول له هات من الآخر .. إنت عايز إيه ؟ وعاصرت موضه الشارلستون والهيبيز والميني جيب في نهايتها قبل ظهور الجينز من ماركات إف يو إس ، وسونيتي ، ومومينتو ، ولحقت ببدايات ظهور الحجاب ، لم تكن الفتيات محجبات قبلها

أنا من جيل كان يقرأ يومياً عمود أحمد بهاء الدين بالأهرام وفكرة مصطفى أمين بالأخبار ونص كلمة لأحمد رجب وعلامة إستفهام لعبد السلام داود ، ونبيل عصمت في الصفحة الفنية تحت عنوان أبونضارة ، وكتابات محسن محمد بالجمهورية ، وشيئ ما لنادية عابد بقلم أحمد بهاء الدين في مجلة صباح الخير قبل أن يكتبها مفيد فوزي ، وكان يكتب في صباح الخير لويس جريس وحسن فؤاد ورؤف توفيق وتدهشني رسومات حجازي وأشعار فؤاد قاعود ، أنا من جيل كان يتابع يوميا كاركاتير صلاح جاهين بالأهرام ولم يكن يعجبني وقتها ولكنه أعجبني عندما نضجت ، وكانت مجلة حواء هي المجلة النسائية الوحيدة وبها باترون هدية ، ومجلة الكواكب هي المجلة الفنية الوحيدة وكان يرأس تحريرها حسن إمام عمر وقبله كمال النجمي ، أما المجلات الفنية الأخرى فكانت لبناينة مثل الشبكة عن دار الصياد والموعد ونورا لمحمد بديع سربيه ، ومجلة "سمر" وهي عبارة عن قصص فوتوغرافية مصورة لنجوم إيطاليين بالأبيض والأسود وهم نجوم معروفين للقارئ مثل كاتيوشا الجميلة وفرانكو داني وكانت صورهم بوسترات تعلق في غرف النوم في ذلك الوقت



أنا من جيل حضر مظاهرات الدفاع عن أفغانستان وحملات الجهاد والمجاهدين في الجامعة ضد الإتحاد السوفيتي وحكومة نجيب الله الموالية للإتحاد السوفيتي ومظاهرات سليمان خاطر ، أنا من جيل عاصر كارتر وريجان في أميركا وتاتشر وجون ميجور في بريطانيا وليونيد بريجينيف في روسيا وهيلموت شميت في ألمانيا وجيسكار ديستان وميتران في فرنسا وساندرو برتيني في إيطاليا ، وسقوط الشاه وعودة الخوميني إلى مدينة القُم في إيران ، ومقتل الملك فيصل قبل حكم الملك خالد ، والحبيب بورقيبة في تونس وهواري بومدين في الجزائر قبل الأمين زروال ، وإغتيال الرئيس اللبناني بشير الجميل ، وسقوط شاويسكو في رومانيا والقبض عليه وقتله ، والإطاحة بجعفرالنميري وتولي سوار الذهب السلطة الإنتقالية لمدة عام


أنا من جيل أول من شهد قضايا الفساد متمثلا في الفراخ الفاسدة لتوفيق عبد الحي وكانت توزع أوراك كبيرة بحجم غريب يقال انها أوراك رومي ، ثم المرأة الحديدية هدي عبد المنعم قبل كثير من قضايا الريان والسعد والهدى مصر ، أنا من جيل عاصر تعطل جميع تليفونات القاهرة من الساعة الثانية للساعة الثالثة في نهار رمضان بسبب مسابقة يومية على القناة الثالثة تقدم جائزة فورية ألف جنيه من شركة الريان

أنا من جيل حضر إنقطاع الكهرباء في جميع أنحاء مصر في الثامنة مساءاً وعاد في بعض المناطق في الثانية صباحا ، يوم أن عاشت مصر كلها في ظلام دامس قبل ان يقع زلزال مصر الرهيب أوائل التسعينات الشهير ، أنا من جيل شهد ظهور جهاز التسجيل الكاسيت كإختراع حديث تستطيع ان تتكلم وتسجل صوتك وتسمعه بعد ذلك وكان ذلك سحر مابعده سحر ، قبل أعوام من ظهور الفيديو الذي يسجل صوت وصورة ، أنا من جيل من شهد بدايات ظهور الكومبيوتر كان شبيه بلوحة المفاتيح فقط ويسمى سنكلير أو كومودور أربعة وستين وكانت سعته أربعة وستون كيلوبايت كيلو وليس ميجا وكان المونيتور هو جهاز التلفزيون وتحميل برنامج الكتابة عن طريق جهاز التسجيل تاخذ عملية التحميل خمس دقائق وتكرر المحاولة عشر مرات قبل أن تنجح عملية التحميل كان البرنامج على شريط كاسيت يعطي صوتا مثل صوت الفاكس في التليفون ثم ظهرت اجهزة المونكروم ( كتابة فقط باللون الاخضر ) وكومبيوتر من نوع اي بي ام متوافق وهو إما نوع إكس تي أونوع إيه تي وطبعا لايوجد شيئ اسمه صورعلى الكومبيوتر قبل ظهور برامج داتا بيز ولوتس وان تو ثري وبالطبع لايوجد شيئ اسمه انترنت قبل ظهور معالجات من نوع متين ستة وتمانين وتلتماية ستة وتمانين ولغة البرمجة هي البيسك وبرنامج التشغيل هو الدوس وكانت الإسطوانات الفلوبي بحجم خمسة وربع انش وليست تلاتة ونص وحجم الهارد 16 ميجا ، وبعدها ظهر الاتاري ذو الثمان لعبات كنا نترك مذاكرة الجامعة ونجلس بالساعات نلعب لعبات عقيمة مثل عبور الشارع أوالتزلج أو سباق السيارات بشكل سيارة أشبه بشخبطة

أنا من جيل كان إنتظر تسع سنوات لتركيب التليفون وكل عام يُقال لك أن هناك لجنة العام المقبل وكان وقتها رقم التليفون مكون من أربع أرقام ، وللإتصال بالقاهرة من مدينة المنصورة يستدعي الأمر الذهاب للسنترال وتحويل المكالمة لتليفون المنزل في توقيت معين لمدة معينة وعندما يفشل السنترال في طلب المكالمة تعود له في اليوم التالي بالإيصال لتحصل على النقود التي دفعتها

أنا من جيل درس مبادئ الإنجليزية وإيه أبل وبي بوول وسي كات في المرحلة الأعدادية ، وفي الثانوية درست مبادئ الفرنسية ودرست الكيمياء بالرموز العربية مثل يد2 أ ويد2 كب أ4 وحساب المثلثات بإختصارات جا ، جتا ، ظا ، ظتا بدلا من ساين وكوزاين وتان وكوتان وكان يستعمل جدول اللوغاريتمات في الرياضيات وتخرجت من الهندسة ولم أدرس حاسب آلي لم تكن هناك مادة بذلك الإسم وقتها

أنا من جيل شاهد مع الآخرين لأول مرة أفلام حسن الإمام خلي بالك من زوزو ، وبالوالدين إحسانا ، وأفلام مثل السقا مات والصعود إلى الهاوية ، وقطة على نار ، وأفواه وأرانب ، ورجب فوق صفيح ساخن الذي استمر سبعة وأربعون إسبوعاً ، وسواق الأتوبيس ، والعار ، والباطنية ، وإنتبهوا أيها السادة ، والمذنبون وخمسة باب وأمواج بلاشاطئ وخائفة من شيئ ما وجنون الحب والمرأة التي غلبت الشيطان وكم بكينا مع حبيبي دائما وحضرت بدايات عاطف الطيب ومحمد خان وخيري بشارة

سعدت أني عشت هذا الزمن والأجمل أن إستطعت التواصل مع الجيل الحالي فلم يكن هذا الجيل إلا إمتداد للجيل السابق يعاصر أحداثا وتطورات لو سمعنا عنها أيامنا لما كان يتوقعها أحد

بسمة وزهرة
19-01-2010, 05:09 PM
الله عليك استاذ محمد ما اجمل هذا الجيل جيل الحواديت
وابلة فضيلة كنت انتظرها بفارغ الصبر
وبرنامج ورقه وقلم ومرايه وهذا ما حببنى فى مهنتى الحاليه

كنت اتعلم منه واجمع ابناء الجيران واعلمهم
ولهذا احببت مهنة التدريس وخاصه اللغه العربيه

تحياتى للجيل المميز

مهندس محمد عبد الرحيم
30-01-2010, 09:35 AM
الله عليك استاذ محمد ما اجمل هذا الجيل جيل الحواديت
وابلة فضيلة كنت انتظرها بفارغ الصبر
وبرنامج ورقه وقلم ومرايه وهذا ما حببنى فى مهنتى الحاليه

كنت اتعلم منه واجمع ابناء الجيران واعلمهم
ولهذا احببت مهنة التدريس وخاصه اللغه العربيه

تحياتى للجيل المميز


مشكورة اختنا الغالية / بسمة
على مرورك الكريم الذى انار صفحات الموضوع
وعلى فكرة الموضوع مفتوح للجميع ومن حق الجميع ان يدخل ويشارك بزكرياته وعمل حلقة كاملة عن زكرياته من هذا الجيل الجميل
اشكرك وياريت تشاركى ولو بسطور قليلة عن زكرياتك فى هذا الزمن الجميل

بسمة وزهرة
30-01-2010, 09:20 PM
مشكور اخى محمد

انا من جيل التليفزيون الابيض والاسود الكبير وكان قناتين فقط

وبيشطب الساعه 12
وبيفتح الساعه 3
ماعدا الجمعه الساعه 9 صباحا
والراديو الكبييير على الرف ويسكت نحدفه باى شئ فى ايدنا يتكلم
زمن اللمه الحلوة على الطبليه الخشب
هقول ايه ولا ايه
زمن ياريته يعود:024:

مهندس محمد عبد الرحيم
06-02-2010, 02:23 PM
مافيش احلى من ايام زمان طبعا
ايام ماقبل الدش والموبايل
والاجهزة الكتير اللى قطعت كل اواصر الاتصال بين افراد الاسرة
على فكرة انا دايما باقفل التليفزيون واتجمع انا واسرتى فى غرفتى او غرفة الاولاد ونقعد نتكلم ونحكى حكايات ونقول فوازير
عشان نخلص من زحمة الدش والقنوات التليفزيونية الكتير

ونحاول نسترجع ايام زمان الجميلة
ايام اللمة الحلوة وحكايات الجدة والخالات
اشكرك صديقتى الغالية بسمة وزهرة على المداخلة الاكثر من رائعة

بسمة وزهرة
07-02-2010, 05:12 PM
البرد اللى بيمر علينا اليومين دول بيفكرنا بالقديم

تعالوا نشوف حالنا الان المدفاة موجودة
فين زمان وابور الجاز

وتحمير البطاطس عليه وناكل سخن وتحمير القرنبيط والعدس الاصفر الله عليه

تعالى دلوقتى وشوف عيالنا لا دا مش حبيبنه ولا دا

ياه عاوزنا نرجع زى زمان قول للزمان ارجع يا زمان

مهندس محمد عبد الرحيم
08-02-2010, 10:30 AM
والله عندك حق يا استاذة بسمة
فين زماننا وفين زمن اولادنا
شوفى زمان كان فيه كام نوع من انواع الحلويات
يادوب نوعين تلاتة
دلوقتى ملايين الانواع وياريت عاجب
شوفى زمان كان فيه كام قناة فى التليفزيون وشغالين كم ساعة وفيهم كام ساعة للاطفال
دلوقتى الاف الساعات ومئات القنوات فقط للاطفال
شوفى زمان كان اللى عنده كورة ولا لعبة بالزمبلك يبقى عامل ازاى
دلوقتى اشكال وانواع اللعب ده غير بقى المتوسيكلات والبسكليتات
طبعا مافيش شك ان اولادنا عندهم امكانيات كتير جدا وصلت للكمبيوتر والمحمول والالعاب الكهربائية
بس تفتكرى عندهم السعادة اللى كانت عندنا زمان
مش عارف ومش هاقدر احكم بس اللى اقدر اقوله ان احنا كنا سعداء جدا بالحاجات البسيطة اللى كانت عندنا ويمكن هما كمان يكونوا سعداء بالحاجات الكتيييييييييييير قوى اللى عندهم
وزى ما قولتى حضرتك
عايزنا نرجع زى زمان قول للزمان ارجع يا زمان
تحياتى لشخصك الكريم

بسمة وزهرة
08-02-2010, 03:18 PM
بالفعل اللعب زمان كانت العروسه البلاستيك العقيمة واللعبه البسيطة ام زنبلك وكنا بنخاف عليها ونقدس لعبتنا

دلوقتى العرايس اشكال والوان واللعب كتير واولادنا يفرحون نعم بها لكن للحظات وبعدها مصيرها القمامة لانها اتكسرت للظفر باللعبه الاخرى

فين احترامهم لاشيائهم وواذا قلنا ليهم كدا يقولوا ياه انتم دقه قديمة

ياريت نعود للدقه القديمة
فين لمة الاسرة المقدسه فى الوجبات الاساسيه

دلوقتى فى لمة بس يوم الاجازات فقط
كنا نحترم دخول الاب البيت ولا صوت الا اذا نادى هو للاكل وبعدها للحوارات الجميله وحواديت قبل النوم ومن الساعه 9 النوم للاسرة ولكن الان ليلهم اصبح نهار والنهار ليل

فين وفين وفين
كتير استاذ محمد
شكرا لحوارك الممتع

مهندس محمد عبد الرحيم
11-02-2010, 10:08 AM
ده انا اللى باشكرك على مشاركتك الرقيقة الجميلة
مشكورة الصديقة بسمة على المشاركة التى انارت صفحات الموضوع
ولسة برده العرض متاح عشان حضرتك او اى زميل او زميلة يدلى بدوله فى الموضوع ويكتب حلقة او اكثر عن زمن الزكريات الجميلة
زمان وايام زمان
وانا من هذا الجيل زمن الحب الجميل

بسمة وزهرة
11-02-2010, 02:02 PM
يمكن مش عايزين يفتكروا ايام زمان

او زمن الفن الجميل علشان ما يكبروش ويعجزوا مثلنا

هههههههههههههههههه
تحياتى

جنرال
15-02-2010, 04:37 PM
استمتع

استمتع

استمتع

ااااااااااااااااستمتع

بسمة وزهرة
15-02-2010, 04:55 PM
فاكر اخى محمدالسهرات الحلوة لام كلثوم كانت بتبقى معاده والكل هس وبيسمعوا وهما ساكتين

وكنا بنستمتع معاهم تعالى دلوقتى خبط ورزع موسيقى عاليه
وتلاقيهم فرحانيين

كان المطرب مش يطلع على المسرح الا وهو كامل البدله

تعالى دلوقتى لبس ايه وفاتح قميصه لغايه وسطه وموقع بنطلونه
وشوف الجيل الان صوات وصريخ
الحمد لله اننا من زمن جميل

اشكرك اخى الفاضل

بترجعنى للزمن الجميل

مجدى ابن النيل
15-02-2010, 05:21 PM
فينك يازمان أيامك الحلوة واللى كان

حاجات كتيرة أدور عليها ما ألا قيها

كان عندنا على سطح البيت بلاص جبنة قديمة ومش

كان التنافس والتحدى بين الكبار والأفتخار

بجودة الجبنة والمش أفتكر كان عند أنشاء بلاص جديد

تجهز الجبنة القريش وتجفف فى الشمس حتى تتحجر

ثم تودع فى البلاص مع خميرة من مش وجبنة فديمة

ولارنج مقطع وعجوزة و فلفل أخضر حراق وطحينة

ومادة حافظة من عند العطار أسمها سنامورة

وشطة وترمس مرثم يغلق البلاص بأحكام

يترك فى الشمس ما يقرب عام

هنا تكون النتائج باهرة ويكون الأفتخار

وكانو بيقولو أن الطبيخ نفس وكدة بردة البلاص

وكان فى أصناف من الطعام الجميل

يجهلها هذا الجيل وأن ذكرت لا يعرفها

مثل الفول النابت / البصارة / سد الحنك

الفولية /الصيدية الكدابة /الكشك /

زمان جميل راح ورحت معاه ناسه

الله يرحم الكبار ويقدر الصغار

بسمة وزهرة
15-02-2010, 05:25 PM
ونسيت فوق السطوح الطيور المختلفه كنا نربيها

وبرضه امهاتنا يتسابقن فى طيور مين الحلوة

وعاش ايه ومات ايه
وكان الخير موجود فى كل بيت

ياريت يا زمان ترجع تانى

مهندس محمد عبد الرحيم
25-02-2010, 10:49 AM
يمكن مش عايزين يفتكروا ايام زمان

او زمن الفن الجميل علشان ما يكبروش ويعجزوا مثلنا

هههههههههههههههههه


فشر .. مين اللى عجز
ده الجيل الجديد هو اللى معجز من قبل ما يتولد
احنا جيلنا بيبدا يعجز فى الستينات ويمكن اكتر شوية\اما الجيل ده اخره الاربعينات ده لو قدر


اما بالنسبة لزمن الفن الجميل والمرب المحترم والكلام الرائع الغير مبتذل فهذا يحتاج الى مواضيع ومواضيع

ده كفاية اغانى مطربة زى مروة دى لواحدها عايزة الواحد يرفع عليها قضية هى والسبكى المنتج بتاعها (مش عايز استشهد بكلمات اغانيها عشان احافظ على الزوق العام)
ولا ناس كده بقولوا عليهم مطربين زى ريكا وكاريكا وعماد بعرور واسامى كده بتاعت مجرمين وحرامية مش فنانين ومطربين
نقول ايه ولا ايه
خلاص زمن الذوق الجميل انتهى
هاقول لحضرتك وللزملاء موقف طريف حصل معايا
كنت فى فرح وفيه دى جى واغانى كتير شغالة كلها تودى فى داهية
منها مثلا مطرب عمال يغنى ويقول "" وشربت حجرين ع الشيشة .ز مع ... وويشا""
وطبعا انا قاعد محرج جدا وتضايق ومستنى حد يقول حاجة
المضحك بقى انى لقيت نفسى الوحديد اللى مش حافظ الاغانى دى
ولا قيت الناس كلها حتى العريس والعروسة بيغنو وبرقصوا مع الدى جى

عرفت ساعتها ان خلاص مافيش فايدة

اشكر لحضرتك مرورك
والى لقاء جديد مع الزمن القديم
زمن الحب والمشاعر والفن المحترم

مهندس محمد عبد الرحيم
25-02-2010, 10:50 AM
استمتع

استمتع

استمتع

ااااااااااااااااستمتع

واحشنى يا باشا
ونفسى اشوف لك حلقة عن الزمن الجميل
دمت لى اخى الفاضل بكل ود
وربنا يديم المحبة

بسمة وزهرة
01-03-2010, 08:58 AM
والله عندك حق اغانى غريبه لناس غريبه

انا بقى فى خطوبه بنتى لقيت اغانى عاليه

وكلام مش مفهوم

والغريب ان الناس مبسوطة والشباب والبنات مش واقفين على حالهم شغالين تمايل

ولا الشباب بيتمايلوا اكتر من البنات

فين احنا اما فى اى مناسبه نجلس مكانا ممنوع حتى نتحرك الا بامر الكبير

وعيب تقوم البنت تتهز حتى

دلوقت الام والاب بيقولوا للبنت قوموا والادهش بيصفقوا لها فرحانيين

وكانهم كدا بيجاملوا صاحب الفرح

الله يرحم الاصول

تحياتى

مهندس محمد عبد الرحيم
08-11-2010, 04:09 PM
النهاردة حسيت انى عايز ادخل الموضوع ده واقراه من جديد
يمكن هروب من الواقع المرير اللى احنا عايشين فيه
يمكن محاولة للعيش داخل الزكريات القديمة الجميلة
لكن للاسف
انا من هذا الجيل
اللى انكتب عليه يعيش لغاية ما يشوف الجيل اللى احنا فيه
انكت نعيش لغاية ما نشوف حال العرب اللى وصلنا اليها زل ومهانة بين دول العالم اجمع
انكتب نعيش لغاية ما نشوف الغلا والكوا اللى الناس عايشة فيه
انكتب علينا نعيش لغاية ما نشوف الجنيه بقى ما يجيبش جورنال
والطماطم بعشرة جنيه
ده غير كمام الخضار الاورجانيك اللى ما اعرفش بكام ...؟؟؟؟
وعشنا وشوفنا الجامعات الخاصة
تدفع كام وتبقى دكتور او مهندس
واللى ما معاهوش ما يلزموش
انكتب علينا نعيش لغاية ما نشوف القيم بتنباع بارخص الاسعار
والفلوس هى المسيطرة
عشنا لغاية ما البلطجة حلت محل الشهامة
والاستغلال حل محل الرحمة
والغش اصبح هو السائد والامانة اصبحت نادرة فى الوجود
هاقول ايه
ده الغنوة فى قلبى
و القلب متعبى
والدمعة فى عينى
والشوق بيلعب بى
عصفور جريح
فى وسط الريح
يا هلترا بكرة
لسة مخبى ايه
؟؟؟؟؟؟؟؟؟؟؟؟

مدحت زيدان
08-11-2010, 08:11 PM
على فكرة ياابو خالد

أنا للتذكرة فقط بقول

أنا صرفت المليم والنكلة والتعريفة (علشان أفكر الأجيال التي تلت جيلي بهذه العملات)

وأنا عاصرت اللحمة وهى بتتباع بالرطل (طبعا ماسمعوش عن الرطل)

وعاصرت الناس وهى لابسة طربوش ولكن لم أضعه فوق رأسي إلا على سبيل اللهو (طربوش جدي)

وعاصرت خشبة الميت وهما واضعين عليها طربوش (يعنى الميت وقور ومش ناسى الطربوش لآخر لحظة)

محمد أفندي
08-11-2010, 08:53 PM
بسم الله وماشاء الله
الفاضل الكريم م/ محمد
اشعت النور والبهجه واظهرت ايام وذكريات انها الزمن الجميل مهما قيل فيها تستخرج منها مورؤثات واصول ونهج حين حادوا عنه كان تغير لجيل واصوله...موضوع قيم جدا...الى لقاء اخر نفرد فيه عن جيلى الذى تعدى 62 عام عن الاسرة وكبير العائله والزواج والمعاملات احتراما لجيل سابق ينقل لجيل حالى..شكرا لك مرة اخرى ومرات لطرحك الجميل للموضوع...

ملاك بلا روح
08-11-2010, 09:49 PM
الله عليكوا وعلى جمال ذكرياتكم
انا من نفس جيلكم
جيل القلب الحنون والصدق فى القول والفعل
اللمه فى ليل الشتا ء
لحد دلوقتى بفتكرها نسهر على لمبة جاز كنا لسه مدخلناش الكهربا بنقعد كلنا على السرير ابو عمدان النحاس
انا واخواتى ووالدتى
وتبدا تحكى ليناالحواديت حاولت افتكرها احكيها لاولادى او لحفيدى معرفتش
وكانت بتلاعبنا لعب كلنا نحط صوابعنا على السرير بعد ما تسمى كل واحد باسم فاكهه
وتبدا تنادى على الفاكهه ويطلع الصباع او ينزل واللى يغلط يقع من اللعبه
بستغرب على السرير ابو عمدان ازاى كان بيسعنا
ولما تيجى ليلة الوقفه وبابا يجيب لية الحذاء الجديد وفستانى اخده فى حضنى انام بيه
علشان العيد يجى بسرعه
وفاكره لحد دلوقتى البرقع بتاع عمدان السرير كان ابيض وفيه تطريز باليد عباره عن عناقيد عنب ازرق
فكرتونى بجمال الايام دى
لكن صدقونى لحد دلوقتى بلاقى فى منطقة والدتى بمصر القديمه
الناس هما هما
نفس الطيبه نفس السؤال على الكل ولما حد يعمل محشى لازم يفرق بالاطباق
وايام الاعياد بيتزاورو واللى معرفش يجيب طلبات العيد
بتلاقيها عنده وبزياده من اهل المنطقة
صدقونى زمنى موجود مكنش زمان
لكن بحب ارجع لطفولتى تانى وايام الاعياد
واشكرك اتاذى محمد على موضوعك
فعلا مميز دائما ومبدع

هناء محمد
09-11-2010, 10:46 AM
الله على دى ايام عمرها ما ترجع تانى مهما حاولت اعمل ولو حاجه بسيطه من اللى كنا بنعملها زمان

لا الناس هى هى ولا الزمن هو هو كل شىء اتغير بقى ماسخ زى اكل الايام دى لا لون ولا طعم ولا ريحه .

زى الايام المفترجه دى كنت لازم اجيب لبس العيد ولازم كله يبقى جديد ف جديد . وبابا الله يرحمه يجيب لنا العيش الناشف عشان الفته اللى مفيش منه دلوقتى مش عارفه ليه . يمكن مش عارفين ينشفوه من رداءة الدقيق المخلوط بالرمل والمسامير وناقص يحطوله اسمنت .

افتكر مرة امى جابت لنا اللحمة بتاعه الفته من عند جزار جديد وراحت تطبخها وفضلنا من الفجر نسوى فيها لغايه عصر تانى يوم وفى الاخر اكتشفنا انها لحمة جملى ههههههههههههههه . وكانت توبه نتعامل معاه .

و العيديه انا فاكره جنيه بحالو ووووووووووو يانهاااااااار كنت بعمل البدع بيه .
ولا جيرانا والاغانى اللى كانوا يشغلوها طول ايام العيد واحنا واقفين نغنى معاهم - ولا الفسح والاماكن اللى كنا بنروحها
كانت ايام اجمل ايام فين الايام دى دلوقتىىىىىىىىىى .
الله يرحم الجميع .................ويتولانا ربنا برحمته الواسعه .

مهندس محمد عبد الرحيم
09-11-2010, 02:10 PM
على فكرة ياابو خالد

أنا للتذكرة فقط بقول

أنا صرفت المليم والنكلة والتعريفة (علشان أفكر الأجيال التي تلت جيلي بهذه العملات)

وأنا عاصرت اللحمة وهى بتتباع بالرطل (طبعا ماسمعوش عن الرطل)

وعاصرت الناس وهى لابسة طربوش ولكن لم أضعه فوق رأسي إلا على سبيل اللهو (طربوش جدي)

وعاصرت خشبة الميت وهما واضعين عليها طربوش (يعنى الميت وقور ومش ناسى الطربوش لآخر لحظة)


حلوة قوى حكاية الطربوش على خشبة الميت
عشان يعرفو انه كان وقور
ههههه
دلوقتى يحطوا سى دى على الخشبة
عشان يعرفو ان المرحوم كان له فى الكمبيوتر
والانتر نت
يسلم لى مرورك الغالى جارى العزيز / مدحت
تحياتى

مهندس محمد عبد الرحيم
09-11-2010, 02:14 PM
الله على دى ايام عمرها ما ترجع تانى مهما حاولت اعمل ولو حاجه بسيطه من اللى كنا بنعملها زمان

لا الناس هى هى ولا الزمن هو هو كل شىء اتغير بقى ماسخ زى اكل الايام دى لا لون ولا طعم ولا ريحه .

زى الايام المفترجه دى كنت لازم اجيب لبس العيد ولازم كله يبقى جديد ف جديد . وبابا الله يرحمه يجيب لنا العيش الناشف عشان الفته اللى مفيش منه دلوقتى مش عارفه ليه . يمكن مش عارفين ينشفوه من رداءة الدقيق المخلوط بالرمل والمسامير وناقص يحطوله اسمنت .

افتكر مرة امى جابت لنا اللحمة بتاعه الفته من عند جزار جديد وراحت تطبخها وفضلنا من الفجر نسوى فيها لغايه عصر تانى يوم وفى الاخر اكتشفنا انها لحمة جملى ههههههههههههههه . وكانت توبه نتعامل معاه .

و العيديه انا فاكره جنيه بحالو ووووووووووو يانهاااااااار كنت بعمل البدع بيه .
ولا جيرانا والاغانى اللى كانوا يشغلوها طول ايام العيد واحنا واقفين نغنى معاهم - ولا الفسح والاماكن اللى كنا بنروحها
كانت ايام اجمل ايام فين الايام دى دلوقتىىىىىىىىىى .
الله يرحم الجميع .................ويتولانا ربنا برحمته الواسعه .
صدقينى يا ام علياء
دايما احب ادخل الموضوع ده واقراه
واقراء مشاركات الناس اللى فيه
حقيقى احساس جميل بزمن جميل
لكن فين احنا دلوقتى
حتى العيد ما عدش بيفرح زى زمان
بمجرد ما نخلص صلاة العيد
بحس ان العيد خلص
ربنا يرحمنا من الايام العجيبة اللى احنا عايشينها
تحياتى لشخصك الكريم

مهندس محمد عبد الرحيم
14-11-2010, 08:55 AM
المشاركة الاصلية بواسطة محمد افندى
بسم الله وماشاء الله
الفاضل الكريم م/ محمد
اشعت النور والبهجه واظهرت ايام وذكريات انها الزمن الجميل مهما قيل فيها تستخرج منها مورؤثات واصول ونهج حين حادوا عنه كان تغير لجيل واصوله...موضوع قيم جدا...الى لقاء اخر نفرد فيه عن جيلى الذى تعدى 62 عام عن الاسرة وكبير العائله والزواج والمعاملات احتراما لجيل سابق ينقل لجيل حالى..شكرا لك مرة اخرى ومرات لطرحك الجميل للموضوع...


الاخ المحترم
البطل / محمد افندى
معذرة لتاخرى فى الرد على حضرتك وذلك لظروف خارجة عن ارادتى حيث اننا فى اخر العام وعندى اعمال كثيرة اقوم بها للتجهيز للعام القادم
فارجو قبول اعتذارى
كما اننى اعبر عن مدى سعادتى بمشاركة حضرتك فى هذا الموضوع العزيز جدا على والقريب الى قلبى
موضوع الذكريات الجميلة للزمن الجميل
حيث كانت الصداقة صداقة قائمة على الحب وليست المنفعة
وكان الناس يتحلون بالاخلاص والوفاء
كنا نعيش فى عائلة كبيرة
الجار يعين الجار ويساعده على مصائب الدنيا
والاخ يساند اخاه
والصديق يعطى ولا ينتظر الرد
كانت ايام جميلة
سيدى الفاضل سعيد بمداخلتك المضيئة وساكون اكثر سعادة
لو شاركتنا بحلقة كاملة
تحدثنا فيها عن زكريات حضرتك
فى هذا الزمن الجميل
تحدثنا فيها عنم القيم التى كانت موجودة فى هذا الزمن
وللاسف اضمحلت ولم يعد لها وجود فى زمننا الحالى
القائم على المصلحة المادية والعلاقات النفعية
اشكرك سيدى واكرر اعتذارى
دمت لى بكل ود

مهندس محمد عبد الرحيم
14-11-2010, 02:08 PM
ملاك همس الحارس
مشاركة ولا أروع
بكل عفوية وتلقائية
وتعبيرات فى منتهى البساطة والإيحاء
عبرتى عن زمن الذكريات الجميل
ولكن ما كتبتيه قليل من كثير
فمازلنا متعطشين للمزيد
فأرجو ان لا تبخلى علينا بمزيد من ذكرياتك عن هذا الزمن الجميل
زمن الحب والسعادة
زمن الالفة والمودة
زمن لمة العيلة والصداقات البريئة
أشكرك سيدتى على تشريفك للموضوع
وأسف لتاخير الرد
تقبلى تحياتى وتقديرى وشديد اعتذاري للتأخير فى الرد
وارجوا ان تمنحينا المزيد عن هذا الزمن الجميل

ملاك بلا روح
14-11-2010, 03:36 PM
استاذى محمد اشكرك على قبولى مشاركتم ذكريات الزمن العذب
زمن أحببت أن يعود لى مره اخرى ولكن فى كلماتى وذكرياتى ربما كانت قليله لكن اتذكرها
واشعر بمذاقها للحين
الغد يوم وقفه عرفات وكان هذا اليوم مميز عندنا لان بيه الصيام
وبنحضر الافطار ويجب وكان من عادة والدى رحمة الله عليه
ان يذهب يوم وقفه عرفه الى قليوب حيث منشئ ويأتى لنا بلحمة العيد من عند عمى لانه جزار
ويجب مع اللحمة يوجد الكبده الضانى لافطار يوم عرفه
مرت السنون وللحين ابحث عن طعم اللحمة التى كنت اكلها لم اجده
حتى الكبده بملح وفلفل اسود وبسمنه البلدى لافطار يوم وقفه عرفه
كان لها مذاق اخر
مش عارفه الناس اللى تغيرت طعم الاكل فى فمهم ام اللحمة اللى تغيرت
حتى الزبده البلدى كان لها رائحه يجب ان توضع على الفته معلقه كبيره بفلفل اسود
بعمل نفس الطريقه للحين لكن لا اجد نفس المذاق
الزمن مش هو بس اللى تغير لا حتى الاكل والهوا والماء
انا من زمن كنت احس بالصفاء بين الناس
ربما وجد فى بيئه والدتى لسه رائحه الزمن الماضى
لكن تعالى عندى كل واحد فى حال الجار ميعرفش ايه اللى فيه جاره حتى لو فرح او ميت
اصبح الميت ممكن يموت بالايام من غير ما حد يحس بيه لحين طلوع الرائحه
عارفه انى بكتب خربشات مش متوازنه
لكن بداخلى ذكريات ربما غير مرتبه
لكن احسها بفتحى هذا الموشوع
واشكرك استاذ محمد على موضوعك

مهندس محمد عبد الرحيم
15-11-2010, 03:47 PM
ويجب مع اللحمة يوجد الكبده الضانى لافطار يوم عرفه
مرت السنون وللحين ابحث عن طعم اللحمة التى كنت اكلها لم اجده
حتى الكبده بملح وفلفل اسود وبسمنه البلدى لافطار يوم وقفه عرفه
كان لها مذاق اخر
مش عارفه الناس اللى تغيرت طعم الاكل فى فمهم ام اللحمة اللى تغيرت
حتى الزبده البلدى كان لها رائحه يجب ان توضع على الفته معلقه كبيره بفلفل اسود
بعمل نفس الطريقه للحين لكن لا اجد نفس المذاق
الزمن مش هو بس اللى تغير لا حتى الاكل والهوا والماء


الاخت الغالية ملاك جميل الروح
كل سنة وحضرتك طيبة
وعيد سعيد على حضرتك وعلى الامة الاسلامية كلها
اختى الفاضلة
صدقينى من كام يوم كده كنت باتكلم مع اصدقائى فى نفس الموضوع اللى حضرتك كتبتيه
وكنت باخد اراء الجميع
هو ايه اللى اتغير
طعم الاكل
ولا احساسنا بالاكل
كل حاجة ما عدش لها طعم
من اول سندوتش الطعمية بالطحينة
لغاية اللحمة والكبدة والكباب
مرورا بالفاكهة والخضار
عارفة حضرتك
حتى طعم وراءحة الايام
ما عادتش زى الاول
كانت المناسبات ايامها ليها طعم كده نحسه
وكان ليها رائحة جميلة بنشمها
لكن دلوقتى الايام كلها شبه بعض
ما عدش ليها ريحة ولا طعم
حقيقى سعيد بكلماتك التى احلى ما فيها العفوية والتلقائية
كلمات تخرج من القلب وتستقر فى القلوب
اشكرك سيدتى وبانتظار المزيد
من كلام حضرتك الرقيق الذى يحمل بين ثناياه عبير الزمن الجميل
تحياتى وتقديرى لقلمك الرائع

ملاك بلا روح
15-11-2010, 04:38 PM
ايه الى تغير صحيح احنا ولا الايام
ليه اولادنا بردوا طالعين مش حاسين بمذاق ولا الطعم زينا
يبقى العيب فى الايام ولا فى الاكل نفسه
اولادنا نسيوا كل شئ عن طعم الاكل نسيوا الفول والطعميه عن البصاره اللى بتمنى انى اعملها
لكن اولادى بيرفضوها
اصبحوا عايزين التك اوى
حتى الهوا كنا بنحس بيه وكانت الشمس لها دفء لنا حتى فى الصيف
لكن دلوقتى شوف لو قعدت شويه فى الشمس هتمرض وتتعب
وان مكنش الهواء مكيف مبقناش نعرف نش هوا ربنا
ايه اللى حصل
احساس ان الخير انقرض
والحب اصبح شحيح
والرحمة اصبحت مستحيله
وحب الناس اصبجت عملة صعبه
وده كله اللى خلا كل شئ اتغير
مش هقول هرمونات الخضار او الخضار المسرطن لا
اقرب مثلا انا زمان لما كنت بعمل دقيه محشى ورق عنب كنت بعملها بحب
علشان عارفه ان اولادى بيحبوها فكان الطعم بيتغير وبتكون روعه
تعالى دلوقتى تتعمل نفس الدقيه لكن مش زى الاول اهى دقيه وخلاص
ويبقى لازم علشان يرجع كل شئ بنفس المذاق
يجب ان نعود نحن الاول لانفسنا
فابدا بنفسك لعوده زمنك الجميل
اعذرنى اخى محمد على كلامى
لكن مازال فى الجبعه الكثير مشحون بالداخل
ربما افراغه من داخلى يجعلنى اعود لانفسى
وكل عام وانت طيب انت واسرتك الكريمه

وليد مدحت زيدان
18-11-2010, 09:49 AM
أستاذنا الباش مهندس محمد

أنا بقى من جيل فتح عينه وجد الفيديو كليب والموبايل والشات

لاشفنا نكسة ولاحرب ولا أناشيد وطنية

صحيح حظنا أحسن من اللى سبقونا فى تكنولوجيا العصر

ولكن شفنا أمريكان بيبرطعوا فى المنطقة وحصار على غزة وتجويع وقتل لهم

لاندري شئ عن تاريخنا لان همنا الأول نجد شغل

ومش مستعدين للأسف نقلب فى كتب التاريخ ولا العادات والتقاليد ولا الموروث من الأجداد الا لما نضمن مستقبلنا

ده واقع الشباب كله ومش أنا وحدى

رجاء ماحدش يزعل منى ده واقع

مهندس محمد عبد الرحيم
20-11-2010, 11:19 AM
المشاركة الاصلية بواسطة استاذة / ملاك
ويبقى لازم علشان يرجع كل شئ بنفس المذاق
يجب ان نعود نحن الاول لانفسنا
فابدا بنفسك لعوده زمنك الجميل
اعذرنى اخى محمد على كلامى
لكن مازال فى الجبعه الكثير مشحون بالداخل
ربما افراغه من داخلى يجعلنى اعود لانفسى
وكل عام وانت طيب انت واسرتك الكريمه

الاخت الفاضلة / ملاك جميل الروح
اتفق مع حضرتك كثيرا فى ما قلتى
علينا ان نعود لانفسنا وان نكون صادقين تمام الصدق مع انفسنا
وعندها فقط سنشعر بلذة الحياة وجمالها
سيدتى سعدت بتشريفك لى فى هذا الموضوع العزيز والقريب جدا لقلبى
وفى انتظار ما بقى فى الجعبة
ودعوة مفتوحة لتفريغ كل الشحنات والاحاسيس المكبوتة
وللعودة الى الاصول التى اوشكت على الذوبان والتلاشى فى هذه الايام المليئة بكل ما هو مزيف
اشكرك سيدتى وفى انتظار المشاركة القادمة بكل شغف

مهندس محمد عبد الرحيم
20-11-2010, 11:26 AM
أستاذنا الباش مهندس محمد

أنا بقى من جيل فتح عينه وجد الفيديو كليب والموبايل والشات

لاشفنا نكسة ولاحرب ولا أناشيد وطنية

صحيح حظنا أحسن من اللى سبقونا فى تكنولوجيا العصر

ولكن شفنا أمريكان بيبرطعوا فى المنطقة وحصار على غزة وتجويع وقتل لهم

لاندري شئ عن تاريخنا لان همنا الأول نجد شغل

ومش مستعدين للأسف نقلب فى كتب التاريخ ولا العادات والتقاليد ولا الموروث من الأجداد الا لما نضمن مستقبلنا

ده واقع الشباب كله ومش أنا وحدى

رجاء ماحدش يزعل منى ده واقع


الابن الغالى / وليد
ساعات بحسد جيلكم على كل الامكانيات المتوفرة لديكم
والتى لم تكن متوفرة لدينا (ولا حتى واحد على مائة منها)
لكن لما بتامل حياتنا وحياتكم بجد بتصعبو على خالص
فزمنكم زمن السرعة وعدم التركيز
كله بيجرى وراء كله
مافيش حتى وقت للاستمتاع
زمن مادى غريب
لم يعد هناك مكان للمشاعر ولا للاحاسيس
كله بيجرى وراء المصالح والفلوس
كل اللى اقدر انصحك بيه انت واولادى
لازم ترجعوا لدينكم من تانى
واوعى الدنيا تسرقكم من انفسكم
يا بنى اللى مالوش قديم عمره ابدا ما هايبقاله جديد
لازم تقرأوا تاريخ الاجداد وتتعلمو السيرة النبوية
وترجعوا لدينكم دايما
عشان تقدرو تلاقوا نفسكم وسط هذا الزمن الذى ضاع فيه كل شىء
اشكرك يا استاذ وليد على تشريفك للموضوع وكل التمنيات بنجاحك فى المستقبل

سامي
13-01-2011, 07:09 PM
انا من هذا الجيل

قلنا هانبني و ده احنا بنينا السد العالي
اعظم مشروع انشائي في القرن العشرين
و شاهد تحويل مجري النيل

جيل كانت يقضي اجمل ايام العيد في زيارة للسد العالي
و كنا نحس بمتعة يحسدنا عليها رواد ديزني لاند
جيل تسلق صخور السد من قاعدته الي قمته
انا جيل بلدي يا بلدي
بلد الثوار يا بلدي .. بلد الاحرار يا بلدي
انا من جيل صورة و مشينا في بلاد الله بصوت الحق بنجاهر

مشينا في بلاد الله

بصوت الحق .. بنجاهر
و بالحرية و المساواة
نباهي الدنيا.. و نفاخر

و قلنا سلام علي النوام
و سيبناهم ... و سيبناهم

قالو لنا منين .. و رايحين فين

جاوبناهم .. جاوبناهم

من الارض اللي امجادها .. بداية المجد

جاوبناهم
من الارض اللي راسمالها .. العمل و الكد

جاوبناهم
من الارض اللي اعلامها .. الهرم و السد

و تاريخنا مالوش اول و لا اخر

و شافونا ,, و عرفونا
قالو لنا من بلد ناصر
قالوا لنا من بلد ناصر


انا من جيل كان يقف في انتظار موكب الرئيس بالساعات
و لما كنا نشوفه قدامنا كنا نجري ورا العربية لحد ما يغيب عن عيوننا
انا من جيل سمع خطاب التنحي لناصر
و قضينا طول الليل في الشارع بنقول حنحارب
انا من جيل عاصر العظماء نكروما رئيس غانا
و احمد سيكتوري رئيس غينيا و عاصر مصرع جيفارا و لومومبا

و كان بيقرا مقال بصراجه لهيكل يوم الجمعه
و ينتظر يسمعه في الاذاعة بعد المغرب

و من جيل شاف صالح سليم و طه اسماعيل و الفناجيلي
و عشان اخي مدحت الزملكاوي شفت كمان عبده نصحي
بيلعب كورة شراب قدام سينما ابن البلد
و شفت عمر النور و يكن و سمير قطب
دول قبل طه بصري و فاروق جعفر

انا من جيل حيرت قلبي معاك و انت عمري و فات الميعاد و فكروني
جيل اكل البصارة و طبق الكشري من عند الجيران
و اكل المحشي و هو نازل من علي النار في غطاء الحله
و شرب الشاي الاسود من علي قوالح الذرة
جيل مص عيدان القصب و نحت الدوم باسنانه
و شرب الميه من القلة و من الزير

انا من جيل عاش عدي النهار و سنوات الصمود
و شاركت في تشريفة استقبال للرئيس السادات
بلبس الثانوية العسكريه و كان بيني و بينه 4 خطوات

و عاش بسم الله و الله اكبر يوم العبور العظيم
من جيل عاصر بداية الانفتاح السداح مداح
و البيه البواب و انتبهوا ايها السادة

كفايه كده
عذرا علي الاطالة

و الشكر و التقدير للاخ الفاضل مهندس محمد
علي الموضوع الشيق
و الشكر وة التقدير لكل اضافة للموضوع
استمتعت بها و عاصرتها

سندريلا الشرق
13-01-2011, 07:34 PM
السلام عليكم ورحمة الله وبركاته

يا خبر !
ما هذا الثراء الفكرى والتاريخى
قرأت الحلقة الأولى فقط أخى مهندس محمد
ورغم أننى وجدت بها أشياء قد حضرتها مثل البرامج الإذاعية إلا أننى أعتقد أنى من جيل الوسط ربما
فأنا فى العقد الثلاثين من عمرى
ولكنك أرجعتنى إلى عالم السحر والخيال
يا له من عالم خرافى كنت أتمنى لو عشته معكم
منتهى البراءة فى كل شئ
منتهى النقاء
منتهى التوكل على الله برغم عدم إنتشار قنوات دينية مثل الآن
جيل عبد الناصر
جيل حليم وأم كلثوم من قبله
يا له من عالم جميل
من حقك أن تفتخر وأنت تقول أنا من هذا الجيل

تحياتى لك ولكل من شارك هنا
وسوف أقرأ كل الحلقات بإذن الله تعالى
وأتواصل معكم

مهندس محمد عبد الرحيم
13-01-2011, 08:39 PM
السلام عليكم ورحمة الله وبركاته

يا خبر !
ما هذا الثراء الفكرى والتاريخى
قرأت الحلقة الأولى فقط أخى مهندس محمد
ورغم أننى وجدت بها أشياء قد حضرتها مثل البرامج الإذاعية إلا أننى أعتقد أنى من جيل الوسط ربما
فأنا فى العقد الثلاثين من عمرى
ولكنك أرجعتنى إلى عالم السحر والخيال
يا له من عالم خرافى كنت أتمنى لو عشته معكم
منتهى البراءة فى كل شئ
منتهى النقاء
منتهى التوكل على الله برغم عدم إنتشار قنوات دينية مثل الآن
جيل عبد الناصر
جيل حليم وأم كلثوم من قبله
يا له من عالم جميل
من حقك أن تفتخر وأنت تقول أنا من هذا الجيل

تحياتى لك ولكل من شارك هنا
وسوف أقرأ كل الحلقات بإذن الله تعالى
وأتواصل معكم

الاخت الفاضلة / سندريللا الشرق
اولا برحب بحضرتك بيننا فى أكاديمية همس الراقية
شرفتينا ونورتينا
صدقينى انا ساعات كتير بهرب من واقعنا اللى احنا عايشينه دلوقتى
وبرجع للذكريات القديمة
يعنى مثلا امشى فى شوارع بورسعيد القديمة
واروح عند الاماكن اللى كنا بنتجمع فيها زمان
أو أهرب فى سماع اغنية من الاغانى القديمة
عامة انا مش باسمع غير اغانى قديمة
خصوصا اغنية الويل الويل .. و ضى القناديل .. لعبد الحليم حافظ
وبعض اغانى عبد الوهاب وام كلثوم وفريد (حكاية غرامى)
وساعتها بحس انى رجعت للزمن الجميل
وبجد لما بسمع اغانى دلوقتى بحس انى بيركبنى ميت عفريت
اسفاف وسفالة وقلة زوق
سيدتى لقد شرفتى موضوع انا من هذا الجيل
وطبعا الموضوع مش بتاعى لوحدى
ده بتاع كل الناس وكل واحد من حقه يدخل ويشارك بحلقة او اكثر عن الزمن الجميل
وياريت حضرتك تشاركى بحلقة عن زكرياتك اكيد هاتكون مشاركة هايلة
وفرصة نهرب شوية من الدوشة والكمبيوتر والدش والموبايل اللى حولوا حياتنا لجحيم لا يطاق
تحياتى وتقديرى لتشريفك همس