المساعد الشخصي الرقمي

مشاهدة النسخة كاملة : ده سوبر زفت مش سوبر جت

مدحت زيدان
08-19-2009, 07:37 PM
أيها الأحبة..
لى كل شهر رحلة ذهاب ورحلى أياب شهرية (بورسعيد \ القاهرة والعكس) فى المسمى سوبر جت
هو فى الحقيقة ومن أنطباعى عنه سوبر زفت مش سوبر جت
وهقول لحضراتتكم ليه
رغم أن هذا المفترض أنه سوبر يعتبر أرقى وسيلة نقل بين المحافظات ألا أنى أعانى منه دوما...ولو مرة ركبته من دون شكوى أتعجب جدا
الشكوى الأولى تبدأ فى توقيت التحرك...مافى مرة يتحرك فى التوقيت المحدد له...والسبب أنه لايتحرك الا اذا أكتمل العدد (يعنى شغالين بالنفر)
الشكوى الثانية تظهر فى أيام الحر حيث إما أن التكييف يكون عطلان أو يكون ضعيف والباص ليس فيه أى شباك
الشكوى الثالثة تكون من المضيفة (ولاأدرى سبب لوجود مضيفة) فالمسافة بين القاهرة وبورسعيد حوالى 230 كم يعنى مش مسافرين السلوم ولا أسوان
والمشكلة فى المضيفة ياحضرات أن أغلبهن هتخليك تطلب يعنى هتخليك تطلب
تصرف عجيب جدا من المضيفة...والغريب أن بعضهن يستخدم أسلوب مش كويس
يعنى ممكن تميل بصدرها على الراكب وتكاد تكون بتهمس له فى أذنه ...فيحرج الراكب ويطلب ولاسيما أن أغلبهن يلحوا على الراكب فى أنه لازم يطلب فيحرج الراكب ويطلب
عجبنى شابين فى العشرينات....المضيفة الصغيرة لذذقت فى الشاب القريب وحاولت وألحت معاهم أنهم يطلبوا ولكن الشابين المحترمين رفضا هذا الاسلوب وأصرا على أن لايطلبا شئ واحترمتهما جدا
هذه المضيفة أيها السادة والسيدات لاحظت أنها خدت الأتوبيس من أوله لاخره حوالى أربع مرات ولم تتوقف مرة واحدة عندى تسألنى تشرب أيه سيادتك؟
تعجبت جدا من أمرها (رغم علمى السبب) فهى رأتنى ملتحى وكبير فى السن ومش هينفع معايا الدلع
رغم أنى والله كنت شارب قبل صعود الباص ولاأحتاج أى شئ لكن صمتت أنى أحرق دمها بأى وسيلة رغم أنى فعلا مش هينفع معى الدلع
فشاورت لها بأصبعى وهى فى أول الأتوبيس وأنا بعد المنتصف
فأتت لى فقلت لها بصوت تعمدت أن يكون مسموع
هو أنت بتختارى الركاب ولا أيه ...هو فيه ركب مش أد كده؟
فقالت
لا أزاى يافندم
فقلت لها : اربع مرات رايحة جاية لم تسألنى تشرب أيه؟
فاعتذرت كثيرا..وطلبت منها نس كافيه رغم ان ليس رغبة ولكن ماحبش شغل الأستعباط
وبعد ماشربت أعطيت لها الحساب ورفضت آخد الباقى وقلت لها أحترمى كل الركاب
وقصة اخرى مع أحدى المضيفات..كنا نعاتب السائق لأن التكييف ضعيف جدا والسائق يتكلم بأدب ويحاول أن يختلق عذر
ولكن المضيفة وقفت تتكلم نيابة عن السائق وتعلمنا الأدب
طبعا مدحت زيدان لايسكت أبدا مع النوعيات دى وتكلمت وأحتديت عليها جدا
لم ينطق أحد من الركاب وكأن المشكلة خاصة بى أنا وحدى...الا سيدة فاضلة علمت منها أنها من قيادات بورسعيد الحزبية النسائية
تكلمت السيدة بمنتهى القوة والحزم....وطلبت تعرف منى أسمى لانها هتكتب شكوى فى الصحافة ضد الشركة
وفعلا أعطيت لها أسمى ورقم موبايلى وفى المساء وجدت رجل خليجى يتصل بى (تقريبا هو صاحب جريدة المصرى اليوم) وتأكد من الشكوى ووعدنى بنشرها...وفعلا وجدت الشكوى وأسمى مدون بها
أخر موقف أيها الأحبة حدث من السوبر زفت حدث اليوم وأنا عائد من القاهرة
تعطل الباص بجوار مدينة السلام والتكييف فصل
نزل السائق وأنتظرنا أنه يعود ويخبرنا عن الموقف ولكنه لم يفعل
نظرنا للخارج فوجدناه يستظل بظل شجرة بعيدا عن الباص
وعلمنا منه أن الباص عطلان وأنه أتصل بالشركة
أنتظرنا 45 دقيقة فى الباص اللى من غير تكييف وطبعا من غير شبابيك ولكن لاجدوى
حاولنا نتصل بالشركة من نمرها الموجودة على التذاكر
وأخيرا وجدنا حد بيرد علينا وبيقول هنتصرف
بع أن أتممنا الساعة وصلت سيارة نجدة الطريق وأصلحوا العطل فى نصف ساعة ولكن التكييف لايعمل
السائق ماشى بينا فى الطريق العكسي ولايرد على أسئلتنا لاننا عاوزين نعرف رايح بينا فين
تطوع مضيف الباص(حيث كان يوجد مضيف ومضيفة) وقال احنا رايجعين الجراج بتاع الشركة الللى فى مدينة السلام علشان نغير الباص
ومدينة السلام ياحضرت تبعد عن مكان العطل بمسافة 3كم فقط
وتساءل الجميع ليه مابعتوش باص آخر مادام الجراج قريب ومليان باصات؟
انتظرنا فى الجراج حوالى نصف ساعة حتى يجهزوا لنا باص آخر
كان فيه 2خواجات فرنساويين ومعهم مرافق مصرى
الخوجات بيتكلموا فرنساوى وأن معلوماتى فى الفرنسية قريبة من الصفر
لم أتبين من كلامهم الاكلمة أجبسيان
وحمرة وجههم تنم عن الغضب فأيقنت أنهم بيسبوا فى مصر
وقلت فى بالى هما معذورين لانهم متعودين أن البنى آدم عندهم قيمته كبيرة جدا
أظرف تعليق سمعته فى الباص أثناء كلامنا مع السائق وهو لايرد علينا قالته أحدى السيدات التى عبرت عن الروح المصرية فى أحلك الظروف
فقد قالت السيدة تعليقا على صمت السائق:
ياجماعة يظهر أحنا مخطوفين ...رهائن يعنى
وعمااااااااااااااااااااااااااااااار يامصر
لؤلؤه الرحمن
08-19-2009, 09:41 PM
لاحول ولا قوة الا بالله العلي الظيم
الواحد لما بيشوف االطريقه اللي بيتعامل بيها الغرب مع افراد مجتمعه
بيحس قد ايه اننا عايشين في ذل ومهانه
مفيش قيمه للانسان
مش عارفه لحد امتي هنفضل كدا
صابرين علي اللي بيجري دا
ربنا يصلح حالنا جميعا
ويارب تعمري بجد يا مصر
في رعاية الله
السلام عليكم
مدحت زيدان
08-19-2009, 10:48 PM
الأبنة الفاضلة لؤلؤة الرحمن
أهلا وسهلا بك فى همس وأهلا وسهلا بك فى متصفحى
شرفتى ونورتى
نسأل الله أن يصلح حالنا جميعا
كل عام وأنتِ بخير
قمرالزمان
08-19-2009, 11:02 PM
استاذ مدحت
انا جربت السوبر جيت فى زيارة للقاهرة

فعلا صعب جدااا

ومواعيدة زفت

ودى كانت اول واخر زيارة للقاهرة

ههههههههههههه

شكرا استاذى

عمار يامصر
غادة رشيد
08-19-2009, 11:47 PM
طبعا عمار يا مصر
هو فى حد يقدر يقول غير كدا
العيب مش فى السوبر جيت استاذى
؟؟؟؟؟؟؟؟؟؟؟

شكرى وتقديرى

غادة رشيد
مدحت زيدان
08-20-2009, 06:42 AM
استاذ مدحت
انا جربت السوبر جيت فى زيارة للقاهرة

فعلا صعب جدااا

ومواعيدة زفت

ودى كانت اول واخر زيارة للقاهرة

ههههههههههههه

شكرا استاذى

عمار يامصر

القاهرة خسرت شرف زيارتك أختى الكريمة قمر الزمان
الله يسامح السوبر جيت
زرونا كل سنة مرة
تحيتى
مدحت زيدان
08-20-2009, 06:44 AM
العيب مش فى السوبر جيت استاذى
؟؟؟؟؟؟؟؟؟؟؟

صح ياعيون مصر الكنانة
أحنا اللى مش بنعرف نركب
غادة رشيد
08-20-2009, 08:33 AM
صح ياعيون مصر الكنانة
أحنا اللى مش بنعرف نركب


معلش بقى با استاذ مدحت خيرها فى غيرها
ان شاء الله الشهر الجاى تكون رحله سعيدة
وكل سنه وانت طيب

عيون ارض الكنانه
غادة رشيد
اسامة الهمساوي
08-20-2009, 02:54 PM
انا شفت الموضوع
وعملت قعدة عرب مع المسئولين عن وزارة المضيفات والمضيفين الاحياء منهم والاموات سواء الساكتين او الساكتات او المحتكين او المحتكات ....
وعملت قعدة مع كبيرسواقين الكفر اللى جنب الكفر بتاعنا وحضرت الاجتماع الست حرم كبير السواقين اللى كان لها راى اخر فى الموضوع .
حاولت اعمل اجتماع مع السمكرية والكمسرية للاسف رفضو الدعوة .
حاولت تانى وعملت اجتماع مع كبير القهوجية وبعد اول ربع ساعة ترحيب وتماسى لقيته استأذن لان عنده واجب عزاء وميصحش يضيع وقته معايا وراح يشرب فنجان القهوة السادة .
برضه لم ايأس وعملت اجتماع مع كبير سفرجية ميت غمر دقهلية برضه اعتذر وقال انا مش فاضى للتهريج بتاعكو ده .. انا ورايا دفنة مسئول كبير وبعد كدة هوزع على المعازيم علب الكباب والكفته ....
قلت عليه النعمة مانا ساكت ... وحاولت اعمل اجتماع مع التربية للوقوف على الاسباب اللى أدت لفضيحة السوبر مركوب ...
عارف يا زعيم قال ايه ؟؟؟؟؟؟؟؟؟؟؟؟؟؟؟؟؟
قال
وقال كمان
وقال كمان وكمان
انتو كدة يابتوع بور سعيد غاوين المنظرة والفشخرة .. وغاويين تمشو فوق الارض !!!!!!!!!!!!!!!!
قلت له ازاى يابا التربى ؟؟؟؟؟؟؟؟؟
قال لى يابا الحاج هاى تنشن ماله بطن الارض ؟؟؟؟؟؟؟
قلت له بسطهالى يابا التربى اصل انا فهمى بسيط وساعات بتغابى شوية
قال لى يابا هاى تنشن لزمتها ايه منظرة ابوك مدحت زيدان ؟؟؟؟؟؟؟
كان ماله مترو الانفاق اللى تحت الارض ؟؟؟؟؟ والا هو بيحب يتمنظر وخلاص ؟؟؟؟؟؟؟ وفرحان اوى بالسوبر بتاع ده .....
قلت له طب ازاى يابا التربى يعمل كدة ومفيش فى بور سعيد مترو انفاق ؟؟؟؟؟؟؟؟؟؟؟؟؟؟؟؟؟؟؟؟؟
لقيت التربى برق عينيه ... وقال ياهاى تنشن بطل غباوة ابوس رجلك ؟؟؟؟
المفروض ان ابوك مدحت زيدان يركب من نفق الشهيد احمد حمدى ومنه الى اى نفق من بتوع رفح اللى بيقولو عليهم دول الافندية اليهود الهبل ... ويركب من رفح عربية نص نقل لغاية موقف السنبلاوين ومن هناك ياخد توكتوك لغاية موقف برقين شرقية .. ومن برقين يركب عربية بالنفر لغاية موقف فاقوس شرقية ... وبعد كدة يركب حنطور ويتحنطر عليه لغاية موقف فارسكور ومن هناك يركب اول مواصلة لدمياط ... ومن دمياط يركب عربية تكون موديل سنة 1960 ويكون لونها اخضر وعليها علم اصفر ويكون السواق واد لونه قمحى وبيحب اللبان الدكر وميكونش بيدخن سجاير بس ممكن يكون له فى الشيشة بشرط تكون على الريق مع اصطباحة المش والملوخية ... والاهم ان السواق ده تكون نيته صافيه وهو سايق يغنى اغنية ياتهدى ياتعدى ... وبعد كدة السواق يطلع على المنصورة ويحجز نص تذكرة من شباک کفر الهنادوة للقطر اللى ناوى يطلع القاهرة بعد سنتين وبعد كدة تنزل تحت الارض وتاخد مترو الانفاق ...................
قلت لنفسى يا سبحان الله
الناس الاكابر كلها معرفتش تحل المشكلة
وابويا الحاج تربى بتاع الانفاق حل الموضوع فى لمح البصر
فعلا
فعلا
فعلا
كان مالنا ومال الاحياء اللى فوق الارض
مالها الاموات اللى تحت الارض
دا حتى تحت الارض طراوة
سنووايت
08-20-2009, 03:30 PM
انا عرفت زعل مدحت من السوبر جيت وهو

هذه المضيفة أيها السادة والسيدات لاحظت أنها خدت الأتوبيس من أوله لاخره حوالى أربع مرات ولم تتوقف مرة واحدة عندى تسألنى تشرب أيه سيادتك؟

ههههههههههههههههههه
هنا مربط الفرس

عموما يا مدحت ياخويا ولا الحوجه للمضيفه ولا لغيرها

اسامه الباشا الله يبارك الله
جاب الحل اى نعم هو توهنا شويه
لدرجه اننا نسينا الموضوع الاصلى بيتكلم على ايه
ومنين يودى على فين
لكن برضه الحاج تربى جزاه الله خيرا قال لنا الحل
ماجي
08-20-2009, 03:34 PM
تصدق فعلا ياأستاذ مدحت أنا المرتين اللى ركبت فيهم السوبر جت لاحظت أن المضيفة فى كل مرة كانت بتلح على أن الركاب يطلبوا طلبات
بجد شئء مهين
شكرا على موضوعك الساخر أستاذى
ماجي
08-20-2009, 03:36 PM
صاحب القلم الساخر هاى تنشن الخطير
هههههههههههههههههههههه
بجد ولا أروع من كده
تربى ياباشا
هههههههههههههههههههه
ماجي
08-20-2009, 03:38 PM
طيب مادام ده حال السوبر يبقى كيف حال وسائل نقل الغلابة فى القرى والنجوع....ده يعنى لو كانوا فكروا يعملوا لهم وسائل نقل
اسامة الهمساوي
08-20-2009, 03:56 PM
انا عرفت زعل مدحت من السوبر جيت وهو

هذه المضيفة أيها السادة والسيدات لاحظت أنها خدت الأتوبيس من أوله لاخره حوالى أربع مرات ولم تتوقف مرة واحدة عندى تسألنى تشرب أيه سيادتك؟

ههههههههههههههههههه
هنا مربط الفرس

عموما يا مدحت ياخويا ولا الحوجه للمضيفه ولا لغيرها

اسامه الباشا الله يبارك الله
جاب الحل اى نعم هو توهنا شويه
لدرجه اننا نسينا الموضوع الاصلى بيتكلم على ايه
ومنين يودى على فين
لكن برضه الحاج تربى جزاه الله خيرا قال لنا الحل

ياسلام عليكى وعلى نباهتك وعلى اخلاصك يا سنووووو وحبك للامة العربية والاسلامية والشعوب المكافحة وبلاد تركب الافيال واحفاد تركب مترو الانفاق ....
يا سنوووووووو العيب فينا احنا ....
ليه ؟؟؟؟؟؟؟؟؟
بنكون شايفين الصح فين .... ورغم كدة ... بنروح مشغلين الحاسة التاسعة ونروح راكبين دماغنا ونفضل نتكلم مع الاكابر اللى لابسين نضارات وماسكين اجندات وامساكيات رمضان وبيوزعو كيماوى على الفلاحين ... ودول فى الاساس شوية شحاتين لسة واخدين قرض من بنك القرية عشان يصرفو على دودة القطن ...
اللى بيزعلنى اننا بنسيب النور ونجرى ورا الضلمة !!!!!!!
مالها افكار ابويا الحاج تربى باشا بتاع الميتين اللى تحت .... والا الموضوع منظرة وخلاص ....
عموما انا حجزت توكتوك من برقين محافظة الشرقية وهاجيلك بور سعيد ....
بس ياريت تجيبى حنطور وتنتظرينى عند نفق احمد حمدى وياريت لو تمسكى ورده بيضا فى ايدك اليمين وشمسية ملونة فى ايدك الشمال عشان اعرفك لان العين بصيرة والايد قصيرة ورزقى ورزقك على الله ... وخلى الواد عبد الرحمن يجيب معاه مضيفة تكون عينها زرقا والتيشرت لونه فضى والزنكلون لونه بنى والتوكتوك يكون بيجره حصانين لونهم ابيض تركى ...
وياسلام لو تجيبى معاكى سندوتش لحمة محمرة على حته فرخة مشمرة وبيضة مسلوقة وحته جبنة قديمة واخلطيهم بطحينة حمرا ..
وانا عن نفسى جايب معايا الفطير المشلتت وتاريخ صلاحيته هينتهى كمان قرنين من الزمان .... يعنى من الاخر متقلقيش ولا يكون عندك قلق كلها 3 سنين واوصل ... واوعى تفقدى الامل ... وخلى الامل موجود ومتقفليش الباب ههههههههه خليه متوارب على سبيل الاحتياط ....
ومن باب الاحتياط وانتى جاية عدى على المحلة وهاتى منديل محلاوى كاروه يتربط على الدماغ فى الحر محدش ضامن الظروف ... وبالمرة عدى على قنا وهاتى معاكى قلتين قناوى يرووا العطش وابلع ريقك واستغفر يا عطشان .... وبالمرة عدى على عمك حمدى الهوارى بتاع التموين وهاتى شوالين دقيق عشان لو اتاخرت عليكو ممكن تبنو فرن بلدى وهاتك يا خبيز هههههههه
ومش هوصيكى على الخضار الطازة وشوية برتقال وموز ههههههههه ويا سلام كدة لو جبتى بطيختين هههههههه واحدة للصيف والتانية للشتا .....
وياسلام لو جبتى معاكى راديو وجبتى اذاعة الشرق الاوسط وتسمعى موال الصبر لفنان الشعب عبده مشتاق الله يرحمه اللى معرفش يصبر على حاله ومات بحسرته على فراق الاحبة اللى كانو لسة متولدوش ..........
بس والنبى لو اتاخرت عليكو .... متقلقوش ... وطمنينى لما توصلو وخليكى على رنة
مدحت زيدان
08-20-2009, 04:00 PM
شكرا ياعيون أرض الكنانة أنك نورتى موضوعى مرتين
مشكوووووووورة ياكريمة
مدحت زيدان
08-20-2009, 04:01 PM
هههههههههههههههههههه
ماشى ياكومندان خلينا ورا التربى
هههههههههههههههههههه
نورت الموضوع أوى أوى أوى ياكومندان
مدحت زيدان
08-20-2009, 04:02 PM
آه منك ياسنو دايما فقسانى
أروح منك فين بس
منوررررررررة الموضوع ياأجدع جيرانى
اسامة الهمساوي
08-20-2009, 04:23 PM
صاحب القلم الساخر هاى تنشن الخطير
هههههههههههههههههههههه
بجد ولا أروع من كده
تربى ياباشا
هههههههههههههههههههه
وانا بقول الموضوع نور وبيلالأ ليه ياولاد ؟؟؟؟؟؟؟
مكنتش واخد بالى ان ماجى هنا ولا كنت شايف كلامها
عموما الغدا عندك قبل رمضان وان شاء الله انا خليت السكرتارية يبدأوا فى اتخاذ اجراءات حجز التذاكر للسفر وبعد مااوصل نفق احمد حمدى هديكى رنة على المحمول بس ياريت تخليه مشحون عشان ميقولش الرقم المطلوب غير متاح مؤقتا لانى على مااوصل هتكون عصافير بطنى بتحتضر من الجوع ....
ومش هوصيكى على المحشى والوزة المحمرة وديك الرومى ابو زلومة .....
وعلى فكرة سنووووووو ورنا وريم وعبد الرحمن هيحضروا العزومة نيابة عن اهالى المدينة الحرة .... وهتحضر جهاد وعريسها وقمر الزمان وكريم المجرى ممثلين عن اسكندرية ...
مش هوصيكى على الشاى بالنعناع ... وياسلام لو حبة شاى بالقرنفل .... لو معندكيش قرنفل هبعتلك شوية على الاميل ...
اوعى تهربى من العزومة زى سنووووووووووو لما هربت من العزومة اياها .............
خلى بالك سنوووووووو هتعمل نفسها فايت ولا همه ولا هى هنا عشان تخلع من العزومة بتاعتها ... بس وحياة النبى هنتعزم عندها يعنى هنتعزم ..........
هههههههههههه عموما موائد الرحمن مالية الدنيا ياسنوووووووووو
والكلام لكى ياماجى من باب الاحتياط
ولقمة هنية تكفى مية
هههههههههه بس اوعى تعملى بكلام المصاروة وتقولى بصلة المحب خروف
هههههههههههههههههههههههههههه
اسامة الهمساوي
08-20-2009, 04:41 PM
طيب مادام ده حال السوبر يبقى كيف حال وسائل نقل الغلابة فى القرى والنجوع....ده يعنى لو كانوا فكروا يعملوا لهم وسائل نقل

والنبى ياماجى متفتحيش فى العلب ومتخبطيش فى الحلل وكلى عيش وربى عيالك وقولى كويس انها جت على أد كدة .... كدة رضا اوى ... وقضا اخف من قضا
مين دول اللى يفكرواااا فى النجوع ؟؟؟؟؟؟؟؟؟ ياباشا الكلام ده خلصان من ايام الفراعنة ........انتى بس مبتقريش كتب التاريخ لانك عايشة فى قاهرة المعز ....
احنا عندنا فى الكفر كل حاجة تمام والجمعية التعاونية فيها الشاى والسكر وعين الجمل وعين الجحش كمان ....
واللى انتى متعرفيهوش انتى وسنوووووووو ان بنك القرية بيدى سلف للفلاحين ....
وكمان عربيات الكارو بتعدى من حارتنا وبيبيعو من عليها حلاوة شعر كمان ... وساعات بيبيعو عليها الفلفل والشطة والكمون وبعد العصر بيبيعو الكسبرة والكراوية والينسون ....
وامبارح بالليل كانوا بيوزعو رقع للجلاليب واللى يشترى رقعتين لبنطلون اخوه بياخد التالتة مجانا .... وعليها حوافز شهادة محو امية ومختومة كمان بالختم بتاع اللمبى اللى كان فى الدرج واللى اول مرة يعرف ان الختم فى الدرج ...
والنبى يا ماجى ابعدى عن طريقى الله يصلح حالك احسن احطك فى دماغى وساعتها متزعليش ....
انتى بتعايرينا فى الكفر عشان معندناش سوبر جيت ؟؟؟؟؟؟؟؟؟؟؟
طب مااحنا عندنا حمير ..... وحمير ملونة كمان .... واللى محدش يعرفه ان عندنا حمير ماركة حصاوى ... بس والنبى ياماجى خلى الكلام ده سر بيننا انا وانتى وجوجو بنت غادة رشيد على ان يظل فى طى الكتمان حفاظا على سمعة سيادة الوزير حسن حسين حسنين ابو فتيحة ... من الاعيان ....
كان معكم هاى تنشن من موقف السوبر جيت محطة مدحت زيدان المواجهة لمحطة هاى تنشن وانت جاى من المنزلة على ايدك الشمال فى اتجاه مرسى مطروح وانتى راجع من السيدة وحبيبى ساكن فى الحسين
ومنتظركم فى برنامج السوبر جيت اليوم على الهواء مباشرة على قناة همس افلام واحلام من انتاج نجع نجعاوى ابو النجوع ومن اخراج كفر كفراوى عين اعيان الكفار ....
عنهم عبده مخلوع
ودمتم بكل خير
ماجي
08-20-2009, 05:16 PM
انا عرفت زعل مدحت من السوبر جيت وهو

هذه المضيفة أيها السادة والسيدات لاحظت أنها خدت الأتوبيس من أوله لاخره حوالى أربع مرات ولم تتوقف مرة واحدة عندى تسألنى تشرب أيه سيادتك؟

هههههههههههههههه
صح ياسنو ياعسولة ياللى فهمتيها بسرعة
ههههههههههههههههه
ماجي
08-20-2009, 05:17 PM
انتى بتعايرينا فى الكفر عشان معندناش سوبر جيت ؟؟؟؟؟؟؟؟؟؟؟

هو أنا أقدر برضه ياباشا
ده أهل القرى والنجوع هما الأصل
وأحنا من غيرهم ولاحاجة
سنووايت
08-20-2009, 08:11 PM
والله ياباشا ان توهت ركبتنا التوكوك والحمير الملونه والحنطور وحنطرطنا ودخلتنا الكفور والنجوع لدرجه انى نسيت الموضوع الاصلى كان بيتكلم عن ايه

هههههههههههههههه

وبعدين ياباشا انت بتقول لحبيبنا ماجى

خلى بالك سنوووووووو هتعمل نفسها فايت ولا همه ولا هى هنا عشان تخلع من العزومة بتاعتها ... بس وحياة النبى هنتعزم عندها يعنى هنتعزم ..........


مين سنو دى دى موجوده معانا انا معرفهاش هههههههه

خلينا فى عزومه ماجىاحسن


شفت يامدحت اللى جرى لنا بسبب ان المضيفه لم تسالك تشرب ايه

الباشا توهنا وغرمنا ونسانا الموضوع الاساسى
مدحت زيدان
08-20-2009, 09:37 PM
شفت يامدحت اللى جرى لنا بسبب ان المضيفه لم تسالك تشرب ايه

الباشا توهنا وغرمنا ونسانا الموضوع الاساسى

ههههههههههههه
والله ياسنو ده الباشا ده حكااااااااااااية
بس أخبار عزومتك أيه؟
همسات حائره
08-21-2009, 02:30 AM
والله أشكرك أخى مدحت

يمكن سلطت الضوء عن شىء به فساد

موجود للأسف فى مصر

بس أنا عارفه

بدون جدوى

ولو إتعمل مليون موضوع

احنا كده بنميل للأهمال وعدم مراعاة الغير

بس مصر جميله

برغم كل مانعانى منها

أحياناً أتمنى مغادرتها

ولكنى أحن لها وأنا فيها!!!

معلش أخى مدحت

وكويس ان حضرتك بتنزل القاهره مره واحده كل شهر

ربنا سلم

برغم إنك بتنور القاهره هنا عندنا

ربنا كريم

أشكرك أخى

همســــــــــات حـــــــــائره
مدحت زيدان
08-21-2009, 06:56 AM
برغم إنك بتنور القاهره هنا عندنا
الله ينور عليكِ أختى الغالية همسات
والقاهرة منورة بكِ وبأمثالك من الناس الطيبين
وأنا عشت عمري كله فى القاهرة
ومصر دى فى دمنا مهما حصل
أمل ال سليمان
08-21-2009, 08:00 AM
هكذا الحال ؟؟

دمتم بود
مدحت زيدان
08-21-2009, 09:01 AM
دوام الحال من المحال زميلتى الفاضلة أمل
كل عام وأنتِ بخير
احمد الهاشمى
08-21-2009, 03:54 PM
حد قالكم تركبوا سوبرجيت

استاذي الفاضل

مدحت زيدن

واخ الكريم

هاي تنشن

واختي سنوو

واختي قمر

وهمسات

وكل الاخوه

هاتولكم كل واحد عربيه

مرسيدس

2009

كمبروسر

جميع الكماليات

500sel

دي رخيصه اوي

ماتوصلش مليون بس

وكمان هاتوسواق اسود

ههههههههههههه

والدنيا هتبقي فُل

ولومش لاقيين عيش تاكلوه

كلوا بسكويت

علي رأي ماري أنطوانيت

وطبعا حضراتكم عارفينها راحت فين

ربنا يلطف بينا يارب

هههههههههه

المشكله ان مافيش حد من الحكومه حاسس

ان الشعب يعاني

والمواصلات اكبر معاناه

لقطاع كبيرمن الناس

السوبرجيت امفروض انه اكبروسيله مريحه

وسياحيه في البلد

وعلي الخطوط الدوليه ايضا

لكن للأسف

دمتم بود
مدحت زيدان
08-21-2009, 05:33 PM
أستاذنا الهاشمي
فكرة برضه العربية المرسيدس دى تستحق التنفيذ