على عينى

[محمدعبداللةربيعى]

كنت اقولك بحبك يحمر وشك من الخشا
كنت بشوفك تملى فرحانة مزقططة ومفرفشة
وكانت ضحكتك فى كل حاجة حواليا موجودة ومعششة
ففرحة عيل بالعيدية ونازل بوس فخدود جدة المكرمشة
وخارج ويا اصحابة لابسين طراطيرهم المزركشة
فى قلب فلاح فى غيطة طرحت شجرتة اول مشمشة
فى عيون زوجة طيبة مستنية راجلها يرجع بعد العشا
محضرة لة الاكل ولابسالة قمصانها المدندشة
فى لمة العيلة على الطبلية وايديهم فى الصحون ملوشة
فهمس الحبيبة على الكورنيش
ماسكين الايدين وهاتك يا حب ووشوشة
فحكاوى الناس على القهاوى
ماسكين فسيرتك بحب طالع من الحشا
فى صرخة معتقل بيندة عليكى من جوة زنزانتة الموحشة
والكرابيج نازلة تهرى فى جتتة المتلبشة
فى معامل زويل وسطور نجيب وشخصياتة المتحرفشة
ونجم والابنودى ولا عم صلاح ورباعياتة المدهشة
*****
لية دلوقتى اقولك بحبك المح فى عنيكى دمعة حزينة ومرة
على عينى دمعتك واللة مالك قوليلى يا اغلى درة
بتبكى على عيالك اللى ماتو تحت الصخور
ولا فى البحور البيضا والحمرة
ولا على شقانا اللى اتلهف وطار على بلاد برة
ولا على كرامتك المجروحة وبعد ما كنتى اسد
حسادك الوقت بيقولو عليكى هرة
احنا كمان
احنا كمان بنبكى فى اليوم الف مرة ومرة
نفسنا دة الكابوس ينزاح من على قلوبنا باة
ونكسر الجرة
عارفة انا نفسى فى اية
نفسى ارجع تمانين سنة ورا وامشى فى مظاهرة
اهتف باسمك واقول
عاشت مصر حرة

[غادة رشيد]

الله الله عليك يا محمد
ومازالت مصر حرة
وستبقى الى الابد حرة
وليست هرة
تحياتى الى اروع انامل
خطت هذة الكلمات وبعثرت هذة الحروف
على متصفحتك الغالية
تقبل تحياتى اخى الكريم
دمت بود

غادة رشيد

[هل ترانا نلتقي]

مشكور أخي الكريم على الكلمات الرائعة

بارك الله فيك

خالص تحياتي